Avdullah Hoti ka reaguar pas publikimit të raportit të fundit nga Zyra Kombëtare e Auditimit, duke ngritur shqetësime të mëdha për mënyrën e menaxhimit të parasë publike në vend, shkruan Kosova.info.

Sipas tij, të gjeturat nga 24 auditime të sezonit 2025/2026 tregojnë një situatë alarmante në ndërmarrjet publike. Ai theksoi se 10 prej tyre kanë marrë opinion negativ, çka nënkupton mungesë të kontrollit financiar dhe paqartësi në shpenzimin e mjeteve publike.

Hoti vuri në dukje se auditori ka konstatuar se aktivitetet dhe transaksionet në këto ndërmarrje nuk janë në përputhje me kornizën ligjore dhe procedurat përkatëse. Në një rast, sipas tij, kanë dështuar pothuajse të gjitha hallkat e mbikëqyrjes institucionale.

Ai gjithashtu theksoi se vetëm gjatë vitit 2025, Zyra Kombëtare e Auditimit ka dërguar 80 lëndë në Prokurorinë e Shtetit, duke reflektuar përmasat e shkeljeve të evidentuara.

Në reagimin e tij, Hoti akuzoi partinë në pushtet për emërime politike në borde dhe pozita kyçe në ndërmarrjet publike, duke i cilësuar këto si faktorë që kanë ndikuar në keqmenaxhimin e financave.

Duke e lidhur këtë situatë me procesin zgjedhor, ai bëri thirrje që abuzimi me paranë publike të marrë fund më 7 qershor 2026, përmes votës së lirë të qytetarëve.