Ministrja e Punëve të Jashtme dhe Diasporës, Donika Gërvalla, mori pjesë në ceremoninë e 10-vjetorit të Akademisë Diplomatike në Pejë.

Në fjalimin e saj, Gërvalla theksoi shembullin e Kosovës si një demokraci të suksesshme dhe të qëndrueshme, duke theksuar rolin e saj në përballjen me krizat më të mëdha. Ajo vlerësoi diplomacinë si mjetin kryesor për zgjidhjen e krizave dhe ruajtjen e stabilitetit dhe nderit njerëzor.

“Historia jonë dëshmon fuqinë dhe rëndësinë e diplomacisë si një mekanizëm kyç për përballjen dhe parandalimin e krizave. Diplomacia është çelësi për zgjidhje të qëndrueshme dhe mbrojtjen e dinjitetit të njerëzve,” tha Gërvalla.

Ajo gjithashtu inkurajoi diplomatët e rinj që të eksplorojnë Kosovën dhe të përjetojnë mikpritjen dhe kulturën e saj unike. “Ju ftoj ta shijoni Kosovën, të njiheni me historinë dhe kulturën tonë, të shijoni ushqimin dhe të ndjeni ngrohtësinë e njerëzve tanë. Krijoni kujtime të paharrueshme gjatë kohës suaj këtu,” shtoi ajo.

Tema kryesore e kësaj ngjarjeje përvjetore ishte “Një rol për njerëzimin: vitaliteti i përpjekjeve diplomatike në reagimin ndaj krizave.”