Presidenti i Turqisë, Rexhep Tajip Erdogan, ka thënë se vendi i tij do të punojë për stabilitetin në Afganistan së bashku me Pakistanin, në mënyrë që të frenojë një valë në rritje të migrimit në mes të ofensivës mbarëkombëtare të talebanëve.

Erdogan tha se afganët po përpiqeshin të migronin në Turqi përmes Iranit, duke kërkuar një përpjekje ndërkombëtare për të sjellë stabilitet në vend dhe për të parandaluar migrimin masiv, shkruan AP, transmeton Klankosova.tv.

Ai tha se Pakistani kishte një “detyrë jetike” për të sjellë paqen dhe stabilitetin në Afganistan, me talebanët në prag të marrjes së kontrollit të kryeqytetit Kabul.

Bashkëpunimi turko-pakistanez do të ishte i nevojshëm për këtë dhe Turqia do të përdorte të gjitha mundësitë për ta bërë këtë, shtoi Erdogan.