Sot zhvillohen ndeshjet e katër grupeve të tjera të xhiros së parë të Ligës së Kampionëve të edicionit 2023-24.

Në program sonte do të jenë sfidat e grupeve A, B, C dhe D.

Sfida më interesante do të jetë ajo e grupit A, mes Bayern dhe Manchester United.

Manchester United hyn në garën e Champions në një formë jo të mirë nga kampionati anglez, ku së fundi u mposht nga Brighton në Old Trafford dhe renditet në pozitën e 13-të me 6 pikë pas 5 xhirove të para.

Bayern ndërkohë në Bundesliga ndan kreun e tabelës me Bayer Leverkusen me nga 10 pikë, me të dyja skuadrat që u ndanë baras në ndeshjen e tyre direkte në fundjavën që shkoi.

Klubi gjerman sidoqoftë ka një rekord tjetet impresiv në fazën e grupeve, diçka që mund ta shqetësojë edhe më shumë klubin anglez përpara kësaj sfide.

Bayern nuk ka humbur asnjë nga 34 ndeshjet e fundit të fazës së grupeve të Ligës së Kampionëve, ecuria më e gjatë e pamposhtur e këtij lloji në historinë e kompeticionit.

Ndërkohë klubi tjetër anglez, Arsenali rikthehet në këtë kompeticion pas një mungese prej 6 vitesh.

Londinezët janë shortuar në grupin B me skuadrat si PSV, Sevilla dhe Lens dhe sonte debutojnë në shtëpi ndaj skuadrës holandeze.

Në grupin C, mbretërit e këtij kompeticioni, Real Madrid luajnë ndeshjen hapëse në Bernabeu ndaj skuadrës gjermane Union Berlin me fillim nga ora 18:45. ‘Galaktikët’ përpos Union Berlinit, në grup kanë edhe Bragën.

Të gjitha ndeshjet që zhvillohet sonte:

18.45 | Galatasaray – Kopenhag

18.45 | Real Madrid – Union Berlin

21.00 | Bayern – Man Utd

21.00 | Arsenal – PSV

21.00 | Sevilla – Lens

21.00 | Braga – Napoli

21.00 | Benfica – Salzburg

21:00 | Real Sociedad – Inter