Dardanet U19 e mposhtin edhe Kazakistanin
Kombëtarja e Kosovës U19 në konkurrencën e vajzave ka shënuar fitore edhe në ndeshjen e dytë, në kuadër të raundit të dytë të kualifikimeve për Evropianin e këtij viti.
Pas fitores ndaj Estonisë, dardanet e reja, të premten në mbrëmje, në Edinburg, kanë shënuar fitore kundër Kazakistanit, me rezultat 2:1, në kuadër të Grupit 4 në Ligën B.
Vashat kosovare e dominuan ndeshjen dhe krijuan shumë raste shënimi, por nuk u treguan aq efikase para portës kazake.
Alketa Rama e kaloi Kosovën në epërsi në minutën e 15, derisa gjashtë minuta para përfundimit të pjesës së parë kazaket i barazuan shifrat me golin e Nursulu Blazhan.
Megjithatë, në pjesën e dytë, të përzgjedhurat e Kushtrim Munishit arritën që pas shumë rasteve të realizojnë golin e fitores nëpërmjet Fortesa Berishës, në minutën e 66.
Dy fitore i ka edhe Skocia, që është kundërshtarja e radhës e dardaneve, me të cilën do të ballafaqohen të hënën, më 11 prill.
Ekipi që e fiton Grupin 4 të Ligës B e siguron promovimin në Ligën A për shortin e ardhshëm të ciklit kualifikues. E kualifikimi në Evropian mund të arrihet vetëm përmes Ligës A.
Përzgjedhësi Kushtrim Munishi, pas fitores së dytë, u shpreh i lumtur me paraqitjen e vajzave, megjithëse vuri në pah shpërdorimin e shumë rasteve.
“Kemi bërë lojë shumë të mirë për çka i përgëzoi futbollistet për angazhimin dhe disiplinën taktike. Megjithatë, është mëkat që nuk i kemi shfrytëzuar rastet, pasi, në bazë të lojës, fitorja është dashur të jetë shumë më bindëse. Kam qenë i bindur se dy ndeshjet e para do t’i fitojmë, ngase kemi punuar shumë për këtë gjë. Tani na pret ndeshja e vështirë me Skocinë, e cila do të jetë përcaktuese nëse do të arrijmë të promovohemi në Ligën A për edicionin e ardhshëm. Sigurisht se Skocia është favorite, por ne nuk i frikësohemi as këtij kundërshtari dhe pres që me lojë të disiplinuar dhe me motiv maksimal të arrijmë të marrim rezultatin që dëshirojmë”, ka theksuar Munishi.