Një mbrëmje magjike dhuroi Kampionati Europian ku në Grupin B gjithçka u përmbys në ndeshjet e fundit. Belgjika bëri detyrën duke u kualifikuar si e para dhe me pikë të plota çka shuan ëndrrën e Finlandës teksa ky sukses i dha një dorë Danimarkës që të fitojë e të kualifikohet direkt.

Në Shën Petërsburg, Belgjika e Lukakut dominon totalisht Finlandën ku edhe pse në pjesën e parë nuk u shënua, nuk munguan rastet për gol e vetëm në të dytën u konkretizuan. Fillimisht shënoi Lukaku por u anulua me VAR dhe në 74’ Hradecky shënon në portën e tij teksa Lukaku realizon dhe kësaj radhe nuk mund të anulohet. 2-0 dhe Belgjika fluturon në 1/8 si e para dhe duhet të presë për të kuptuar rivalin.

Ndërkohë në Copenhagen, ndodhi ajo që duhej të ndodhte, të fitonte ekipi që e meritonte, pikërisht Danimarka. Ekipi i goditur nga drama Eriksen luajti me zemër dhe fitoi bindshëm ndaj Rusisë me rezultatin 4-1 duke kaluar direkt në fazën e 1/8 ku do të përballet me Uellsin.

Një kualifikim që erdhi si dhuratë nga fitorja e Belgjikës dhe që sigursht shkon për atë, Christian Eriksen. Damsgard në të parën hapi festivalin e golave e më pas Poulsen, Christensen dhe Maehle shënuan për nordikët teksa Dzubya për rusët.