Bekim Jashari ka bërë të ditur se nga sot ka vendosur që zyrtarisht të pushojë aktivitetin e tij politik.

Ai tha se deri te vendimi ka ardhur në koordinim të plotë me familjen dhe për disa arsye, teksa shtoi se “nuk e kisha besuar që individë të caktuar do të degradonin gjithçka, duke shpifur, shantazhuar, blerë e manipuluar vullnetin qytetar, vetëm e vetëm për të fituar pushtet dhe ndikim të pamerituar.

Ish-kryetari i Skenderajt dhe djali i heroit Hamzë Jashari,deklaroi se asnjëherë në jetën e tij,  nuk ka pasur pretendime për të marrë pozita politike dhe pushtet, por njëkohësisht nuk i ka ikur dhe nuk do t’i ikë asnjëherë përgjegjësive për t’i shërbyer vendit, në jetësim të amanetit të heronjve, dëshmorëve e martirëve të lirisë.

“E dyta, pas përfundimit të mandatit tim të parë si kryetar i Skenderajt, i hyra garës edhe për një mandat, duke prezantuar projektet e realizuara dhe programin qeverisës për mandatin e dytë. Këtë e kam bërë në formën më demokratike, në emër të garës fer dhe respektim të ligjit për çka edhe kemi punuar e luftuar me shekuj”, është shprehur Jashari.

Ai tha se arsyeja e tretë e largimit të tij nga politika është se situata aspak e favorshme në të cilën gjendet shteti kurse e katërta,  në këto rrethana se si zhvillohet politika në Kosovë, Jashari deklaroi se prania e tij në politikë, në këtë momentum të tillë nuk mund të vazhdojë.

Sidoqoftë, ish-kryetari i Skenderajt deklaroi se angazhimin e tij për qytetarët e Skenderajt e ka bërë vetëm me qëllim që t’i shërbej në paqe kurse opozitën konstruktive në këtë komunë, tha se do të vazhdojë të bëjnë asamblistët e listës së pavarur “Ideal”, së bashku me ish bartësin e listës, Nuredin Lushtaku si udhëheqës i përkohshëm, deri në zgjedhjen e strukturave drejtuese në muajt në vazhdim.