Carlos Alcaraz është kualifikuar në gjysmëfinale të ‘Australian Open’, pasi mposhti Alex De Minaur në tre sete në çerekfinale.

Spanjolli pati vështirësi në setin e parë, por më pas dominoi plotësisht takimin, duke triumfuar 7-5, 6-2, 6-1 në dy orë e 18 minuta lojë.

Para publikut vendas, De Minaur u përpoq të qëndronte në lojë, por Alcaraz arriti të kontrollojë ritmin e ndeshjes, duke thyer shërbimin e australianit në fillim të çdo seti dhe duke mos i lënë hapësira për rikthim.

Kjo është gjysmëfinalja e parë e Alcarazit në Melbourne dhe e katërmbëdhjeta në total në turnetë Grand Slam, duke konfirmuar vazhdimësinë e tij në elitën e tenisit botëror.

Në gjysmëfinale, spanjolli do të përballet me Alexander Zverev. Tenisti gjerman u kualifikua pasi mposhti amerikanin Learner Tien në katër sete, 6-3, 6-7, 6-1, 7-6, në një ndeshje që zgjati 3 orë e 11 minuta.

Për Zverev, kjo është gjysmëfinalja e dhjetë në karrierën e tij në Grand Slam, e katërta në ‘Australian Open’, ndërsa më parë ka arritur katër herë këtë fazë në ‘Roland Garros’ dhe dy herë në ‘US Open’.