Gjatë ditë së sotme u njoftua se Mbretëria e Bashkuar ka sanksionuar dy kriminelët serbë që operonin në veriun e Kosovës, Zvonko Veselinoviq dhe Milan Radojiçiq.

Përveç tyre, Mbretëria e Bashkuar ka sanksionuar gjithashtu edhe Slobodan Tesic dhe Vladimir Plahotniuc, të cilët akuzohen për disa vepra të ndryshme penale.
Ndaj kësaj, kanë reaguar nga Lista Serbe, nga ku Mbretëria e Bashkuar është cilësuar si armike e Serbisë.

“Dënojmë ashpër lëvizjet shpifëse të armiqve të njohur të popullit serb duke futur në disa lista të zeza nënkryetarin e listës serbe Milan Radoiçiq dhe serbët e tjerë që janë patriotë dhe bartës të dëshmuar të rezistencës ndaj pushtimit të veriut të Kosovës nga Albin Kurti”, thuhet ndër tjerash në reagimin e kësaj partie.

Pos kësaj, në reagim thuhet edhe se, sipas kësaj partie, nuk ka asnjë listë të ngjyrës zezë, të kuqe apo ndonjë tjetër ngjyrë që mund të zvogëlojë respektin e që ka Radojçiq tek serbët.

“Nuk ka asnjë listë të ngjyrës së zezë, të kuqe apo ndonjë ngjyrë tjetër që mund të zvogëlojë respektin që ka tek serbët në Kosovë, nënkryetari i palës sonë z. Milan Radojiçiq. Për më tepër, këto lëvizje transparente dhe etiketime pa asnjë provë kundër tij, që i bën dobi Albin Kurtit ta paraqesë veriun si pjellë krimi, tregojnë gjithë nervozizmin e atyre që duan të shohin serbët në gjunjë për më shumë se dy dekada, të asimiluar apo të dëbuar nga shtëpitë e tyre”, shtohet në reagimin.

Përndryshe, në komunikatën zyrtare të Mbretërisë së Bashkuar thuhet se Radojçiq dhe të tjerër kanë mbushur xhepat përmes korrupsionit dhe vjedhjes dhe se të njëjtit minojnë demokracinë.