62-vjeçari nga Kosova, i cili u aksidentua mëngjesin e sotëm në Portin e Durrësit, nuk ka mundur t’u mbijetojë plagëve të marra. Burime bëjnë me dije se Nexhmi Shabani ka ndërruar jetë në Spitalin Rajonal të Durrësit, ku ishte transportuar menjëherë pas aksidentit.

Ngjarja ndodhi në orët e para të mëngjesit në ambientet e Portit të Durrësit. Sipas të dhënave paraprake, një mjet tip kamion, me drejtues 49-vjeçarin, Nikolin Merdari, banues në Berat, ka përplasur këmbësorin 62-vjeçarin, Nexhmi Shabani, banues në Kosovë, i cili ishte shofer kamioni.

“Port Durrës/Informacion paraprak. Më datë 28.07.2026, në Portin e Durrësit, në sheshin para skanerit, shtetasi N. M., 49 vjeç, banues në Berat, duke drejtuar një kamion, dyshohet se aksidentalisht ka goditur shtetasin N. Sh., 62 vjeç, banues në Kosovë, drejtues i një kamioni tjetër, i cili po lëvizte në këmbë për të dorëzuar dokumentacionin e kamionit të tij për t’u futur në skaner.

Si pasojë e goditjes, shtetasi N. Sh., 62 vjeç, ka humbur jetën. Shtetasi N. M. u shoqërua në Komisariat dhe po kryhen veprimet procedurale. Grupi hetimor, nën drejtimin e Prokurorisë, po punon për zbardhjen e rrethanave të aksidentit”, njofton policia.