Një muaj pas dy tërmeteve shkatërruese që goditën Venezuelën, rreth 50,000 persona rezultojnë ende të zhdukur, ndërsa numri i viktimave ka kaluar 5,300. Sipas vlerësimeve të Bankës Botërore, dëmet materiale arrijnë mbi 17 miliardë euro, ndërsa kostoja e rindërtimit mund të jetë dy herë më e lartë.

Në qytetin La Guara, ekipet e shpëtimit vazhdojnë kërkimet nën rrënojat e rreth 200 ndërtesave të shembura.

Një nga shpëtimtarët përshkroi një nga momentet më të rënda të operacionit.

“Pardje nxorëm një grua që andej. Shtatë metra poshtë, gjetëm fëmijët e saj; ata vdiqën duke u përqafuar me njëri-tjetrin në shkallë”, tha ai.

Mes familjeve që ende presin lajme është edhe gjyshja e Yusvely, një vajze gjashtëvjeçare që mbeti nën rrënoja.

“Ajo është bllokuar midis dy trarëve. Sot po pastrojnë zonën për të parë nëse mund ta nxjerrin”, tha ajo.

Sipas OKB-së, mungesa e pajisjeve dhe burimeve vazhdon të pengojë operacionet e kërkim-shpëtimit. Shumë familjarë janë detyruar të kërkojnë vetë të afërmit e tyre. Mes tyre është edhe Milagris Rodriguez, e cila ende nuk ka gjetur nënën e saj.

“E kërkova në spitalet në Karakas, kudo që më thanë se mund të ishte. Isha gjithashtu në vendin ku po çohen të vdekurit, por ende nuk mund ta gjej”, tha ai.

Bilanci i deritanishëm tregon mbi 5,300 të vdekur, rreth 16,500 të plagosur dhe më shumë se një milion njerëz që varen nga ndihma humanitare. Organizatat humanitare paralajmërojnë edhe për pasoja të rënda psikologjike tek të mbijetuarit.

“Kemi raste kur njerëzit, për fat të keq, kanë vendosur t’i japin fund jetës sepse nuk kanë një vizion të qartë për të ardhmen – ata kanë humbur anëtarët e familjes, shtëpitë dhe një burim të ardhurash, dhe nuk u është ofruar mbështetje”, theksoi drejtoresha e organizatës “Otro Enfoque”, Zuly Mejias.

Ndërkohë, Rafael Velasquez, nga Komiteti Ndërkombëtar i Shpëtimit, theksoi nevojën urgjente për rindërtimin e infrastrukturës publike:

“Më shumë se 38 spitale dhe 400 shkolla janë prekur. Shumë prej tyre janë strehimore të përkohshme në shkolla, dhe mësimi fillon në shtator. Shkollat duhet të riparohen dhe të sigurohen akomodime alternative për njerëzit që aktualisht qëndrojnë në to”, tha ai.

Ekspertët vlerësojnë se procesi i rindërtimit do të zgjasë me vite dhe do të kërkojë miliarda euro, ndërsa Venezuela vazhdon të përballet me një krizë të thellë politike dhe ekonomike, të rënduar nga sanksionet, hiperinflacioni, korrupsioni dhe keqmenaxhimi i burimeve të naftës.