Dinamo City ka arritur një kualifikim të jashtëzakonshëm në raundin e dytë kualifikues të UEFA Conference League 2026/27, pas një triumfi spektakolar ndaj Astanas në “Astana Arena”.

Skuadra shqiptare përmbysi humbjen 1-0 nga ndeshja e parë, duke fituar me rezultatin 4-1 në udhëtim dhe duke siguruar kalimin më tej me rezultatin e përgjithshëm 4-2.

Ndeshja nisi në mënyrën më të keqe për Dinamon, pasi vendasit kaluan në avantazh në minutën e 23-të. Kažukolovas realizoi nga pika e bardhë e penalltisë, duke e vendosur Astanan në pozita të favorshme.

Momenti vendimtar i takimit erdhi në fillimin e pjesës së dytë, kur Kažukolovas u ndëshkua me kartonin e dytë të verdhë dhe la skuadrën kazake me një lojtar më pak. Dinamo shfrytëzoi menjëherë superioritetin numerik, pasi vetëm një minutë më vonë Bruno Dita barazoi rezultatin nga pika e penalltisë.

Të besuarit e Dinamos vazhduan presionin dhe në minutën e 62-të përmbysën rezultatin. Hekuran Berisha shënoi golin e dytë pas asistimit të Manellarit, duke barazuar edhe rezultatin e përgjithshëm të përballjes.

Koha e rregullt përfundoi 2-1 për Dinamo City, çka e dërgoi sfidën në vazhdime. Në minutën e 93-të, Lorenco Vila realizoi golin e tretë pas asistimit të Ismailit, duke e afruar skuadrën tiranase me kualifikimin.

Në sekondat e fundit të kohës shtesë, Dinamo kompletoi mbrëmjen e madhe. Goli i katërt në minutën e 124-t vulosi fitoren 4-1 dhe një sukses historik në tokën kazake.

Në raundin e dytë kualifikues të Conference League, Dinamo City do të përballet me fituesin e përballjes mes Sheriff Tiraspolit dhe NK Aluminij.