Trepça e Mitrovicës do të vazhdojë të garojë në Superligën e Kosovës në hendboll në konkurrencë të meshkujve.

Skuadra me traditë nga Mitrovica të dielën në Lipjan e fitoi ndeshjen e plejautit ndaj Istogut me rezultatin bindës 34:24.

Trepça në Superligë u rendit e parafundit me 18 pikë dhe për këtë qëndrimin në elitë është dashur ta sigurojë përmes plejautit.

Istogu ishte i dyti në Ligën e Parë me 18 pikë. Dhe do të vazhdojë të garojë në këtë nivel garash.

“Xehetarët” nisën bindshëm dhe shpejt krijuan epërsi të lartë që e mbajtën deri në fund të takimit.

Ermir Smaka ishte më efikasi te Trepça me 10 gola. Tetë i realizoi Sali Maxhera.

Albios Beqiraj ishte më efikasi te skuadra e talentuar e Istogut me 10 gola. Pesë i shënoi Dren Gashi.

Nga Superliga është larguar Vushtrria, ndërsa Deçani kthehet në elitë. /Kosova.info/