Shqiponja e Gjakovës është finalistja e dytë e plejofit në Superligën e Kosovës në hendboll në konkurrencë të femrave.

Në gjysmëfinalen e dytë, të enjten në Banjë, Shqiponja e mposhti Istogun me rezultat 28:24.

Shqiponja e kishte fituar edhe ndeshjen e parë në Gjakovë.

Kështu Kosova do të ketë kampion të ri te hendbollistet. Istogu është kampion i edicionit të kaluar.

Pas pjesës së parë rezultati ishte 14:13 në të mirë të Shqiponjës, që rriti dallimin në katër gola në fund të pjesës së dytë.

Alma Nivokazi udhëhoqi Shqiponjën me tetë gola.

Joneide Olikaka i shënoi 15 gola për Istogun. /Kosova.info/