Instituti i Kosovës për Drejtësi (IKD) ka bërë të ditur se, bazuar në burime brenda Kuvendi i Republikës së Kosovës, Zëvendësuesi i Sekretarit të Përgjithshëm, Arben Loshi, është shkarkuar në mënyrë arbitrare nga pozita e tij, pikërisht në ditën kur pritet të mbahet seanca për zgjedhjen e Presidentit/es së Kosovës.

Sipas IKD-së, në mbledhjen e 2 marsit 2026 të Kryesisë së Kuvendit ka qenë në rend dite edhe pika për përzgjedhjen e Sekretarit të Përgjithshëm. Gjatë kësaj mbledhjeje, Kryetarja e Kuvendit, Albulena Haxhiu, thuhet se ka tentuar t’i bindë nënkryetarët për anulimin e konkursit për këtë pozitë.

Burimet e IKD-së theksojnë se Loshi ka qenë kandidati me më së shumti pikë nga procesi i përzgjedhjes i zhvilluar nga Komisioni për Rekrutim, ku kanë marrë pjesë edhe ekspertë të pavarur. Ky proces është monitoruar nga projekti i Ambasada e Mbretërisë së Bashkuar në Kosovë.

Procesi i përzgjedhjes kishte përfunduar në dhjetor 2024 dhe, sipas IKD-së, nga ajo kohë pritej vetëm emërimi formal i tij. Po ashtu, Këshilli i Pavarur Mbikëqyrës për Shërbimin Civil të Kosovës ka njoftuar Kuvendin se nuk është paraqitur asnjë ankesë për këtë proces dhe se procedura është zhvilluar në përputhje të plotë me Ligjin për Zyrtarët Publikë, ku Loshi kishte arritur 99.2 nga 100 pikë.

Në këtë kontekst, IKD e konsideron të papritur dhe të pashpjeguar vendimin për shkarkimin e tij, veçanërisht duke pasur parasysh kohën kur është marrë ky veprim. Sipas IKD-së, Sekretari i Kuvendit është përgjegjës për përgatitjen dhe hartimin e procedurës së votimit për zgjedhjen e Presidentit/es, çka e bën situatën edhe më problematike nga aspekti institucional dhe procedural.

IKD ka paralajmëruar se do të kërkojë qasje në transkriptin dhe procesverbalin e mbledhjes së Kryesisë, me qëllim të informimit të publikut për arsyet e anulimit të procesit të emërimit.

Në fund, IKD u ka bërë thirrje nënkryetarëve të Kuvendit që, së bashku me Kryetaren Haxhiu, të veprojnë në përputhje me ligjin dhe të procedojnë me përzgjedhjen e Sekretarit të Përgjithshëm bazuar në raportin e Komisionit për Rekrutim, duke u përmbajtur nga çdo propozim të kundërligjshëm që cenon integritetin e procesit dhe parimet e meritokracisë në administratën publike. /Kosova.info/