Drita dhe Gjilani kanë arritur fitore në xhiron e tetë në Superligën e Kosovës në futboll

Derisa skuadra e drejtuar nga Zekerija Ramadani ka mposhtur Malishevën, ekipi i Gjilanit ka triumfuar ndaj skuadrës Prishtina e Re.

Në takimin e zhvilluar në Gjilan, Drita ka mposhtur Malishevën me rezultat 2:1.

Pjesa e parë është karakterizuar me raste për të dy skuadrat, por pa gola.

Në minutën e gjashtëdhjetë e shtatë, Krasniqi ka realizuar nga penalltia për epërsinë e Dritës, ndërsa Malisheva e ka barazuar shpejt me golin e Ibishit. Megjithatë, katër minuta para fundit të ndeshjes, Drita e ka gjetur golin vendimtar, duke siguruar tri pikë të rëndësishme përpara tifozëve të saj.

Në ndeshjen tjetër të ditës, Gjilani ka triumfuar ndaj Prishtinës së Re me rezultat minimal 1:0. Golin e fitores për skuadrën gjilanase e ka shënuar Jarovic në minutën e tetëdhjetë e dytë, duke i dhënë fund sfidës me fitore të ngushtë, por të vlefshme.

Kjo ka qenë ndeshja e parë e Gjilanit nën drejtimin e trajnerit të ri, Debatik Curri. 

Të dielën pritet që të zhvillohen edhe tri ndeshje të tjera. 

Aktualisht tabela e Superligës kryesohet nga Prishtina me nëntëmbëdhjetë pikë, ndërsa në vendin e fundit gjendet Prishtina e Re me shtatë pikë.