Sipas Institutit Hidrometeorologjik të Kosovës, kjo fundjavë do të karakterizohet me ndryshime të dukshme të kushteve atmosferike.

E shtunë, 18 tetor: Parashihet të mbajë mot kryesisht i vranët dhe vende-vende me reshje shiu. Temperaturat minimale do të lëvizin ndërmjet 6°C dhe 9°C, ndërsa maksimalet ditore pritet të arrijnë nga 11°C deri në 14°C. Era do të fryjë nga veriperëndimi me shpejtësi prej 1 deri në 6 metra për sekondë.

E diel, 19 tetor: Pas një dite me reshje, e diela do të sjellë kthjellime dhe vranësira të shpërndara. Temperaturat minimale do të jenë ndërmjet 5°C dhe 7°C, ndërsa maksimalet do të arrijnë nga 11°C deri në 15°C. Era do të vazhdojë të fryjë nga veriperëndimi, e lehtë deri mesatare.

Fundjava do të sjellë pra një përzierje tipike të tetorit me shi, vranësira dhe periudha me diell, prandaj qytetarëve u rekomandohet të kenë me vete çadër të shtunën dhe të shfrytëzojnë ditën e diel për aktivitete në natyrë. /Kosova.info/