Mesfushori i Anglisë, Jack Grealish, është zyrtarisht lojtar i Everton për sezonin 2025/26, pasi klubi nga Liverpool e ka huazuar atë nga Manchester City deri në fund të sezonit.

Marrëveshja përfshin opsionin që Everton ta blejë lojtarin verën e ardhshme për pesëdhjetë milionë funta.

Njëzet e nëntë vjeçari i ishte bashkuar City në vitin 2021 nga Aston Villa për 100 milionë funta, por vitin e fundit humbi vendin titullar nën drejtimin e Pep Guardiola. Me më pak minuta dhe pas lënies jashtë ekipit të Anglisë në Euro 2024, Grealish kërkon të ringjallë karrierën e tij para Botërorit të ardhshëm.

Te Evertoni i trajnerit David Moyes, ai do të mbajë fanellën me numrin 18 – të njëjtin që kanë veshur legjenda të klubit si Paul Gascoigne dhe Wayne Rooney. “Jam shumë i lumtur që jam këtu. Sapo fola me trajnerin, e dija se ky ishte vendi i duhur për mua”, ka thënë Grealish pas prezantimit.

Moyes beson se Everton po e merr lojtarin në momentin e duhur. “Ai e njeh mirë Premier League dhe ne e dimë nivelin që mund të arrijë. Qëllimi i tij është rikthimi në kombëtare dhe ne do të përpiqemi ta ndihmojmë”, është shprehur ai.