Kampioni i Premier League, Liverpooli humbi ndeshjen e Superkupës së Anglisë (Community Shield) pas penalltive ndaj Crystal Palace, në një ndeshje dramatike të zhvilluar në Wembley. Pas barazimit 2-2 në kohë të rregullt, skuadra e Oliver Glasner ishte më e saktë nga pika e bardhë, duke marrë trofeun e parë të këtij lloji në historinë e klubit.

Dy përforcimet e verës për Liverpoolin, Hugo Ekitiké dhe Jeremie Frimpong, shënuan golat e skuadrës së Arne Slot, por Crystal Palace tregoi forcë sidomos në pjesën e dytë, duke shfrytëzuar hapësirat në mbrojtjen e “The Reds”. Trajneri Arne Slot e pranoi se skuadra e tij ka ende punë për të bërë.

“Ndeshje si kjo tregojnë se kemi nevojë për kohë për t’u përshtatur, si në sulm ashtu edhe në mbrojtje. Kemi krijuar më shumë raste sesa sezonin e kaluar, por kemi pranuar shumë gola, dy ndaj Bilbaos dhe dy sot. Duhet të jemi më të mirë në mbrojtje”, tha Slot.

Edhe pse i zhgënjyer nga humbja, trajneri i Liverpoolit nuk po bie në panik para nisjes së kampionatit të premten kundër Bournemouthit. “Jemi Liverpooli, presioni është gjithmonë aty, pavarësisht sa lojtarë afrohen”, shtoi tekniku holandez. Ai gjithashtu lavdëroi Florian Wirtz dhe Ekitiké për paraqitjen e tyre nën presion.

Nga ana tjetër, trajneri i Crystal Palace, Oliver Glasner ishte i entuziazmuar për suksesin: “I jap merita të mëdha lojtarëve. Arritëm të riktheheshim dhe ta vendosnim ndeshjen me penallti. Ishim në të njëjtin nivel me Liverpoolin, ishte një performancë e madhe”, tha ai.

Crystal Palace tani pret vendimin e Gjykatës së Arbitrazhit Sportiv për pjesëmarrjen në Europa League ose Conference League. Glasner tha se rezultati i sotëm është një arsye e mjaftueshme për festë, pavarësisht vendimit të nesërm.

Crystal Palace u përjashtua nga Europa League dhe u transferua në Conference League për sezonin 2025/26, për shkak të shkeljes së rregullave të multi-pronësisë. Sipas rregullave të UEFA-s, një person ose grup që ushtron ndikim në më shumë se një klub që luan në të njëjtin kompeticion evropian nuk lejohet, duke ndikuar kështu në përjashtimin e Crystal Palace nga Europa League pasi John Textor kishte lidhje me Lyonin.