Lazio ka bërë një ndryshim të madh në pankinë. Klubi italian ka shkarkuar trajnerin Marco Baroni dhe ka njoftuar rikthimin e Maurizio Sarri si trajner i skuadrës së parë, vetëm një vit pas largimit të tij nga ky post.

Përmes një deklarate zyrtare, Lazio ka falënderuar Baroni për angazhimin dhe profesionalizmin e treguar gjatë qëndrimit të tij në klub:
“Lazio falënderon Marco Baroni për profesionalizmin dhe përkushtimin e treguar në krye të skuadrës së parë. Klubi i uron atij suksese në karrierën e mëtejshme. Faleminderit, Mister”, ka theksuar skuadra italiane. 

Rikthimi i Sarri është zyrtarizuar të hënën, ndërsa detajet e kontratës nuk janë bërë publike. Sidoqoftë, sipas agjencisë italiane të lajmeve Adnkronos, tekniku gjashtëdhjetë e pesë vjeçar ka firmosur një marrëveshje dyvjeçare me opsion për një sezon të tretë.

Sarri kishte dhënë dorëheqjen në mars të vitit 2024, pas gati tre vitesh në drejtimin e Lazios. Në sezonin 2023–24, Lazio përfundoi në vendin e shtatë në Serie A, një rënie e dukshme në krahasim me vendin e dytë të arritur një sezon më parë.