Kryetari i Komunës së Prishtinës, Përparim Rama, ka shënuar fundin e vitit 2024 me një lajm historik për kryeqytetin. Për herë të parë, mbi 80% e buxhetit të Prishtinës është shfrytëzuar, ndërsa 63% e investimeve kapitale janë realizuar, pavarësisht sfidave të shumta.

Në një deklaratë të ndjerë, Rama falënderoi ekipin e tij, përfshirë drejtorët, zyrtarët dhe punëtorët e komunës, për punën e palodhur dhe përkushtimin e tyre në arritjen e këtyre rezultateve. Ai theksoi se çdo hap është ndërmarrë në shërbim të qytetarëve duke i cilësuar ata si shtyllën kryesore të suksesit të kryeqytetit.

“Secili ka punuar çdo ditë për ta bërë këtë vit të paharrueshëm për Prishtinën. Me punën dhe përkushtimin e tyre, ata treguan se ky qytet ka një ekip që e do dhe që janë forca shtytëse që po e çon Prishtinën drejt lartësive që ajo meriton,” tha Rama.

Kryetari theksoi rëndësinë e vizionit të tij për një Prishtinë që i kthen dinjitetin dhe shkëlqimin e merituar, duke shtuar se përkundër bojkotit dhe bllokadave, kryeqyteti ka shënuar përparime të rëndësishme.

Rama falënderoi gjithashtu qytetarët e Prishtinës për durimin, mbështetjen dhe mirëkuptimin që kanë treguar gjatë gjithë vitit, duke i cilësuar ata si forca kryesore për përparimin e qytetit.

“Le të nisim vitin 2025 me kokën lart, me zemrat plot dhe me një energji të re! Ky është zotimi ynë: ta bëjmë Prishtinën qytetin e energjisë dhe të krenarisë,” përfundoi ai.

Rezultatet kyçe të 2024 për Prishtinën:

Mbi 80% e buxhetit të shfrytëzuar;

63% e investimeve kapitale të realizuara.

Me këtë përmbyllje pozitive të vitit, kryeqyteti nis vitin 2025 me ambicie të reja dhe një energji të ripërtërirë për të vazhduar transformimin në të mirë të qytetarëve. /Kosova.info/