Real Madrid ka shënuar një fitore me rezultat 4-2 kundër Sevilla në Javën e tetëmbëdhjetë të kampionatit spanjoll, duke ngushtuar diferencën me kryesuesin e LaLiga, Atletico Madrid, në vetëm një pikë.

Ndeshja e zhvilluar në “Santiago Bernabeu” ka nisur vrullshëm nga vendasit, të cilët kanë kaluar në epërsi që në minutën e dhjetë me një goditje spektakolare të Mbappe nga rreth njëzet metra, duke e lënë portierin mysafir të shtangur. 

Vetëm dhjetë minuta më vonë, epërsia e Real Madridit është dyfishuar nga Valverde, i cili ka shënuar një gol të jashtëzakonshëm nga rreth tridhjetë metra, duke lënë pa fjalë tifozët në stadium dhe duke e tejkaluar edhe realizimin e Mbappe.

Real Madrid ka vazhduar me dominimin dhe në minutën e tridhjetë e katërt, Rodrygo ka vulosur një tjetër aksion me një gol të tretë për vendasit. Por Sevilla ka reaguar shpejt, duke ngushtuar diferencën në minutën e tridhjetë e pestë me një gol të Romeros, duke bërë që pjesa e parë të mbyllej me rezultatin 3-1.

Në pjesën e dytë, çdo shpresë për një rikthim të Sevilla është shuar shpejt. Vetëm disa minuta pas rifillimit të lojës, Diaz ka finalizuar një pasim inteligjent nga Mbappe, duke e çuar rezultatin në 4-1.

Sevilla ka arritur ta shënojë një gol ngushëllues në minutat e fundit të ndeshjes me anë të Lukebakio, por ishte e pamjaftueshme për ta shmangur humbjen.

Pas kësaj fitore, Real Madrid ka tani dyzet pikë, vetëm një më pak se Atletico Madrid që kryeson tabelën me dyzet e një pikë.