Aktivisti politik Arbër Malota ka ngritur pikëpyetje të mëdha mbi të ardhmen politike të dishepujve të Presidentes Vjosa Osmani dhe drejtimin që ata do të marrin pas distancimit të saj nga projekti politik i ndërtuar me kryeministrin Albin Kurti. Në analizën e tij, Malota thekson se “votuesit e Guxo nuk kanë më arsye të ndjekin një projekt të braktisur nga liderja e tyre.”

Malota kujton momentin e bashkimit politik të Osmanit me Kurtin në prag të zgjedhjeve të vitit 2021, duke e cilësuar si një projekt “të ndërtuar me dashuri” që premtoi një epokë të re për Kosovën. Megjithatë, ai nënvizon se “ajo po e braktis këtë projekt,” duke e zhveshur nga çdo logjikë për t’u mbështetur më tej nga votuesit e listës Guxo.

Në fjalën e tij, Malota i kujtoi opinionit publik një deklaratë të mëhershme të Osmanit, kur ajo theksonte ngjashmërinë e qëndrimeve me Kurtin: “Zogjtë e malit e dinë se ne kemi qëndrime të ngjashme.” Tani, sipas Malotës, ky afrim është bërë i paqëndrueshëm dhe ndasitë mes tyre janë të dukshme.

Ai gjithashtu thekson se largimi i Presidentes nga ky binom nuk e shfajëson atë nga përgjegjësia për gjendjen socio-politike aktuale, e cila është ndikuar nga bashkëpunimi i saj me Kurtin. Për votuesit e Guxo, Malota sugjeron se distancimi i Osmanit mund të përkthehet në humbje besimi, duke shtuar se është e vështirë të shihet një drejtim i qartë për këtë subjekt politik në të ardhmen.

Kjo situatë e komplikuar shton pasigurinë për të ardhmen e votuesve dhe mbështetësve të listës Guxo, ndërsa analiza politike përfundon me pyetjen: “Cilin kurs do të ndjekin dishepujt e Vjosës në këtë situatë?” /Kosova.info/