Lidhja Demokratike e Kosovës (LDK) ka hedhur një hap të rëndësishëm në konsolidimin e saj jashtë vendit duke themeluar dy nëndegët e para në Itali. Në qytetet Treviso dhe Montebelluna, ku jetojnë dhe punojnë shumë bashkatdhetarë, u mbajtën kuvendet themeluese, duke shënuar kështu një moment historik për LDK-në dhe diasporën kosovare.

Në kuvendin e parë të mbajtur në Treviso, delegatët zgjodhën si kryetar të nëndegës z. Gëzim Rexhaj, ndërsa në Montebelluna kryetar i nëndegës u zgjodh z. Bajram Jupaj. Të dy kuvendet zgjodhën gjithashtu kryesitë e tyre dhe delegatët për Kuvendin e Degës, duke hedhur themelet për një angazhim të fuqishëm të diasporës kosovare në Itali për çështjet që lidhen me Kosovën dhe LDK-në.

Sipas Driton Selmanajt, ky është një zhvillim historik që pasqyron entuziazmin dhe vullnetin e bashkatdhetarëve për të kontribuuar në ndërtimin e strukturave të LDK-së jashtë vendit.

Ai theksoi rëndësinë e lidhjes së ngushtë mes LDK-së dhe mërgatës kosovare, duke e konsideruar atë një forcë të jashtëzakonshme që ka dhënë kontribute të rëndësishme për Kosovën në të gjitha fazat e historisë së saj.

“Lidhja Demokratike e Kosovës po rikthehet fuqishëm në çdo vend ku jetojnë dhe punojnë bashkatdhetarët tanë,” tha Selmanaj, duke uruar të sapozgjedhurit dhe duke shprehur mirënjohjen e tij për angazhimin e diasporës kosovare.

Ky zgjerim i LDK-së në Itali përforcon lidhjet mes Kosovës dhe bashkatdhetarëve që jetojnë jashtë saj, duke krijuar një rrjet të ri mbështetës dhe strukturor për aktivitetet politike dhe sociale të partisë në diasporë. /Kosova.info/