Përleshje të shoqëruara edhe me të shtëna me armë zjarri janë raportuar në sheshin “Faruk Elezi”, në Klinë, ku dyshohet për dy të plagosur.

Zëdhënësi i Policisë së Kosovës për Rajonin e Pejës Fadil Gashi ka deklaruar për Telegrafin se plagosjet janë nga arma e zjarrit dhe mjeti i mprehtë.

“Rreth orës 19:00 është raportuar për një përleshje në afërsi të Qendrës së Mjekësisë Familjarë në Klinë. Për pasojë, dyshohet se nga përdorimi i armës së zjarrit dhe mjetit të mprehtë kanë pësuar lëndime dy persona”, ka njoftuar Gashi.

Në vendin e ngjarjes kanë dalë njësitet policore dhe ambulanca.

Të plagosurit janë dërguar për trajtim në Spitalin Rajonal të Pejës.