Vrasja në Podujevë: Vëllai i viktimës thotë se vrasja ishte aksidentale

Dalja në gjueti e dy baxhanakëve nga Podujeva përfundoi në mënyrë tragjike. Në bjeshkën e fshatit Pakashticë të Podujevës u privua nga jeta me armë zjarri 30-vjeçari Mentor Kajtazi. Vrasja e viktimës dyshohet se ndodhi nga pakujdesia nga baxhanaku i tij, Florim Bunjaku 34-vjeç.

Vëllai i viktimës tha shkurt se vrasja ka ndodhur në mënyrë aksidentale.

Familja e 30-vjeçarit të vrarë kishte hapur të pamën sot në fshatin Dumnicë të Podujevës, ceremonia e varrimit ishte caktuar për në orën 15:00, por familjarët nuk pranuan të flasin gjatë për rastin.

Njëri vëlla i viktimës tha se vrasja ka ndodhur në mënyrë aksidentale dhe se i dyshuari me të ndjerin kanë qenë baxhanakë mes vete.

“Po janë baxhanakë mes vete, ata nuk kanë dalë shpesh për gjueti”, tha ai shkurt.

I njëjti shtoi se viktima ka lënë pas vetes gruan dhe fëmijët.

Ndërkohë situatë më ndryshe ishte te shtëpia e të dyshuarit në Pakashticë të Podujevës. Një patrullë e policisë po e ruante shtëpinë e tij për çështje sigurie.

Fqinjët thanë se nuk ishin në dijeni se si ka ndodhur rasti, pasi mali ku baxhanakët kishin dalë për gjueti ishte disa kilometra larg nga shtëpia e tij.

Prapa kësaj veture (shih fotografinë më poshtë), me të cilën dyshohet se morën rrugë baxhanakët, ndodhet mali ku një natë më parë u vra 30-vjeçari.

Si pasojë e terrenit të papërshtatshëm për shkak të kushteve atmosferike, forcat e FSK-së kishin asistuar policinë për tërheqjen e trupit të pajetë.

Go to TOP