Një vozitës me automjet me targa të Zvicrës ka rrezikuar sigurinë publike në trafik, duke kryer një tejkalim të paligjshëm përmes trotuarit në zonën e një udhëkryqi në qytetin e Gjilanit, njofton Policia e Kosovës.

Ngjarja ka ndodhur më 24 korrik 2025, kur vozitësi i automjetit Audi S6, me targa zvicerane (TG), në kundërshtim me Ligjin mbi rregullat e trafikut rrugor, ka tejkaluar në mënyrë të rrezikshme, duke përdorur trotuarin në anën e djathtë. Veprimi i tij ka rrezikuar seriozisht këmbësorët dhe pjesëmarrësit e tjerë në trafik.

Sipas njoftimit, momenti i këtij veprimi të rrezikshëm është dokumentuar edhe nga qytetarët përmes videove që janë shpërndarë në rrjetet sociale dhe nga disa media vendore.

Policia Rajonale në Gjilan, konkretisht njësiti i komunikacionit rrugor, ka vepruar me shpejtësi, duke identifikuar personin përgjegjës dhe duke i shqiptuar gjobën përkatëse në përputhje me legjislacionin në fuqi.

Bazuar në marrëveshjen ndërmjet Kosovës dhe Zvicrës për bashkëpunim në trajtimin e kundërvajtjeve të qytetarëve përkatës në territorin e shtetit tjetër, rasti dhe gjoba ndaj kundërvajtësit do t’i përcillen autoriteteve kompetente zvicerane për trajtim të mëtejmë.

Policia e Kosovës ka ritheksuar përkushtimin për të garantuar sigurinë në rrugë dhe ka ftuar qytetarët që të respektojnë rregullat e trafikut. Po ashtu, qytetarët inkurajohen të raportojnë sjelljet e rrezikshme në rrugë.