Presidenti i SHBA-së, Joe Biden tha në Uashington se Amerika dhe aleatët nuk do të tremben nga kërcënimet e presidentit rus, Vladimir Putin gjersa shtoi se SHBA-të do të “mbrojnë çdo centimetër të territorit të NATO-s”.

Putin nënshkroi dekrete për aneksimin e katër rajoneve të Ukrainës nga Rusia, Zaporozhzhia, Kherson, Donetsk dhe Luhansk, të cilat vendet perëndimore, Bashkimi Evropian dhe NATO-ja e dënuan ashpër.

“Shtetet e Bashkuara nuk do ta pranojnë kurrë. Dhe për të qenë i sinqertë: as bota nuk do ta pranojë kurrë. Ai nuk mund të pushtojë territorin e fqinjit të tij dhe të ikë me të, ai thjesht nuk mundet”, tha Biden.

Sipas tij, SHBA do të vazhdojë t’i japë Ukrainës ndihma ushtarake për mbrojtjen e saj dhe ai vend do të marrë 13 miliardë dollarë të tjerë nga Kongresi amerikan.

“Amerika është plotësisht e përgatitur për të mbrojtur çdo centimetër të territorit të NATO-s me aleatët e saj të NATO-s, çdo pëllëmbë – kështu që, Putin, dua që ju të më kuptoni shumë qartë. Çdo centimetër”, tha Biden.

Ndryshe, Ukraina tashmë ka kërkuar që sa më shpejt të anëtarësohet në NATO.