Nën moton “Muaji i Lirisë”, më 26 dhe 27 qershor 2021, të Treviso (Itali) u mbajt turniri në futboll të vogël për nderë të 22 vjetorit të çlirimit të Kosovës. Ky turnir u organizua në mënyrë brilante nga grup i të rinjve; Fadil Bajraktari, Florim Lumi, Ram Zeqa, Isuf Ademi dhe Kushtrim Gashi.

Turnirin e hapi publicisti Florim Zeqa, i cili, pasi i përshëndeti të gjithë të pranishmit në këtë eveniment sportiv, ekipet pjesëmarrëse i uroj për suksese dhe lojëra të mira gjatë turnirit dy ditor; “Pak rëndësi ka kush del fitues i këtij turniri, rëndësi ka ndjenja jonë shpirtërore për të cilën jemi tubuar, për të shënuar ditën dhe muajin më të dashur dhe më të shenjtë të çlirimit të vendit tonë”.

Në këtë turnir morën pjesë 10 ekipe; Bllaca, Castelfranco, Edil Colgeci, Edil Copertura, Dardania, Grejkoci, Rinia, Sferka, Unik Tejm dhe Veteranët. Edhe përkundër temperaturave ekstremisht të larta, për shkak të pandemisë, të gjitha ndeshjet u zhvilluan në ambient të hapur, me kulturë të lartë sportive dhe në atmosferë të ngrohtë festive.

Për dy ditë rresht, ekipet pjesëmarrëse bashkatdhetarëve iu dhuruan futboll cilësor dhe gola të bukur, duke lënë mbresa të pashlyera tek të pranishmit e shumtë që ishin prezent në këtë aktivitet sportiv, po aq edhe festiv.

Secila ndeshje ishte më e bukur sesa tjetra, por finalja SFERKA (7)-CASTELFRANCO (4) ishte e nivelit të lartë, me futboll cilësorë dhe 11 gola të shënuar nga të dyja e ekipet.

Padyshim, meritat për mbarëvajtjen e turnirit, përveç Këshillit Organizativ dhe ekipeve pjesëmarrëse u takojnë edhe dy referëve profesionist Ivan Barbunio dhe Adriano Covolan, të cilët me profesionalizëm të lartë dhe korrektësi i drejtuan ndeshjet e këtij turniri.

Këshilli Organizativ me mirënjohje i nderoj të gjithë sponsorët që e ndihmuan materialisht mbajtjen e turnirit “Muaji i Lirisë”-Qershor 2021. Me mirënjohje i nderoj edhe tre luftëtarë të lirisë, tre ushtarët e UÇK-së dhe ish pjesëtarët e TMK-së; Selman Bytyqi (i plagosur në luftë), Florim Lumi dhe Qazim Musa. Po ashtu, me mirënjohje u nderua edhe publicisti Florim Zeqa.

Në fund të turnirit, Këshilli Organizativ i turnirit i ndau shpërblimet si në vijim;

portieri më i mirë u zgjodh nga ekipi Castelfranco, Bujar Nuha dhe u nderua me kupë, kurse lojtari më i mirë i turnirit u zgjodh Altin Gashi nga ekipi Sferka cili po ashtu u nderua me kupë. Me kupë dhe mjete simbolike financiare u nderu vendi i dytë (CASTELFRANCO), kurse vendi i tretë (RINIA) u nderua me kupë.

Vendin e parë të turnirit “Muaji i Lirisë”-Qershor 2021, me plotë meritë e fitoi ekipi SFERKA, e cila u nderua me kupë dhe mjete simbolike financiare.

Mirënjohje dhe falënderim i veçantë shkon edhe për “veteranët”, dy lojtarët më të vjetër të turnirit, Sylejman Gashi dhe Bekim Pllana, të cilët me eksperiencën e tyre demonstruan lojëra cilësore gjatë turnirit dy ditor.

Pas ndarjes së çmimeve, Këshilli Organizativ e kishte përgatitur një koktej për ekipin fitues dhe të gjithë ata që kontribuuan për dy ditë rresht për mbarëvajtjen e turnirit.

Edhe në këtë aktivitet sportiv u dëshmua se të rinjtë shqiptar në Itali kanë talent të rrallë për futboll, por që duhet dhënë hapësirë dhe mbështetje më e madhe morale dhe materiale, mediatike dhe institucionale nga autoritetet italiane.

Në fund, vlen për të theksuar se, sponsor gjeneral të turnirit “Muaji i Lirisë”-Qershor 2021 ishin firmat; “EDIL KOLGECI” me pronar Kujtim Kolgeci, “COSTRUZIONI A.G.” me pronar Smail Gashi dhe “EDIL COPERTURA” me pronar Ilir Shala.