Komiteti Olimpik i Kosovës e ka publikuar sot kategorizimin e sporteve, sportistëve dhe të trajnerëve për vitin 2023.

Shtëpia e sportit kosovar i ka ngritur më së larti në këtë renditje sportin e xhudos dhe të futbollit në Kategorinë A.

Në fakt, futbolli është ngritur nga vendi i gjashtë në krye.

Vitin e kaluar kjo temë kishte çuar pluhur pasi kishte ankesa nga bota e futbollit, e cila konsideronte se ishte renditur shumë poshtë.

Por, KOK-u e kishte arsyetuar këtë me arsyetimin se FFK-ja nuk kishte sjellë dëshmi për strategji të duhur për zhvillimin e futbollit.

“Me rekomandim të komisionit përkatës dhe miratim të Bordit Ekzekutiv, Federata me dy medalje të arta olimpike, ajo e xhudos, dhe federata më masive në vend, ajo e futbollit, janë rekomanduar me maksimumin e pikëve, 100. Kategorisë A i është shtuar boksi”, njofton Komiteti Olimpik i Kosovës.