Ambasadori i SHBA-së në Prishtinë, Jeff Hovenier, dhe zyrtarë të tjerë të ambasadës kanë diskutuar dhe avokuar me zyrtarë qeveritarë, përfshirë presidenten Vjosa Osmani, kryeministrin Albin Kurti dhe zëvendëskryeministrin Besnik Bislimi, kryetarin e Kuvendit Glauk Konjufca dhe liderët e partive politike miratimin e amendamenteve në ligjin për lirinë fetare që do të lejonte grupet fetare të fitojnë status ligjor.

Në raportin e DASh-it për Liritë Fetare në Kosovë, thuhet se zyrtarët e SHBA-së u kanë kërkuar zyrtarëve të qeverisë që të respektojnë lirinë dhe pluralizmin fetar dhe të rrisin komunikimin e tyre me grupet fetare.

“Ambasadori dhe zyrtarë të tjerë të ambasadës u kërkuan zyrtarëve të pushtetit qendror dhe lokal, përfshirë kryeministrin Kurti dhe ministrin e Mjedisit dhe Planifikimit Hapësinor dhe Infrastrukturës (Liburn, shën.red.) Aliu, që të respektojnë ligjin për Zonat e Veçanta të Mbrojtura (ZVS), veçanërisht në rastin e rrugës afër Manastirit të Deçanit. Ambasadori, një zyrtar i lartë vizitor i Departamentit të Shtetit dhe zyrtarë të ambasadës avokuan te të gjitha nivelet e qeverisë zbatimin e vendimit të Gjykatës Kushtetuese të vitit 2016 që urdhëronte regjistrimin e pronësisë së tokës në Manastirin e Deçanit, duke i kërkuar qeverisë dhe gjyqësorit që të mbajnë përgjegjës zyrtarët përgjegjës për moszbatimin e vendimit”, ka thënë DASh-i në këtë raport.

Ambasadori dhe zyrtarë të tjerë të ambasadës kërkuan rritjen e dialogut midis zyrtarëve qeveritarë dhe anëtarëve të KOS-it.

Ata, sipas raportit, e përcollën këtë mesazh si në takime private ashtu edhe në deklarata publike, duke kërkuar bashkëpunim ndërmjet pushtetit vendor dhe KOS-it për çështje të tilla si pronësia e pronës, të drejtat e njeriut, liria fetare dhe siguria e përgjithshme.

“Zyrtarët e ambasadës ndihmuan në zgjidhjen e mosmarrëveshjeve midis KOS-it dhe qeverisë në lidhje me statusin e qëndrimit të klerit dhe çështjet e taksave. Në maj, ambasadori iu bashkua krerëve të misioneve diplomatike të Francës, Gjermanisë, Italisë dhe Mbretërisë së Bashkuar në deklaratat në mbështetje të zbatimit të vendimit të Gjykatës Kushtetuese për kontestin e tokës në Deçan dhe vuri në dukje se, pavarësisht një vendimi të ligjshëm dhe peticioneve të mëvonshme, vendimi i gjykatës ende nuk ishte zbatuar. Ambasada përsëriti thirrjen e saj që qeveria të zbatojë vendimin e gjykatës në tetor në një deklaratë për mediat”, u tha më tej në raportin e DASh-it për Liritë Fetare.

Zyrtarët e ambasadës, thuhet më tej në raport, u takuan me të gjitha komunitetet kryesore fetare dhe disa organizata të shoqërisë civile dhe diskutuan ndryshimet në ligjin për lirinë fetare, çështjet sociale me interes të përbashkët, çështjet e lirisë fetare dhe marrëdhëniet e qeverisë me komunitetet fetare.

Në mars, ambasadori Hovenier thuhet se organizoi një diskutim ndërfetar me liderët fetarë, duke përfshirë nga komunitetet Tarikat, Bektashi dhe Kishën e Jezu Krishtit, mbi pluralizmin fetar, dialogun ndërfetar, mbrojtjen e të drejtave dhe lirive individuale dhe amendamentet ende në pritje të ligjit mbi lirinë fetare.

“Ambasada lëshonte shpesh mesazhe në shtyp dhe në mediat sociale në mbështetje të lirisë fetare. Për shembull, ambasadori theksoi në Twitter takimet që kishte pasur në shkurt, mars dhe gusht me krerët e KOS-it në manastiret e Graçanicës dhe Deçanit dhe një vizitë që bëri në korrik në Xhaminë e Madhe në Prishtinë, ku u takua me udhëheqësit e BIK-ut për të shënuar Vitin e Ri Islamik. Në të gjitha vizitat dhe postimet përkatëse në mediat sociale, ambasadori rikonfirmoi mbështetjen për një Kosovë multietnike që respekton trashëgiminë e ndryshme fetare dhe kulturore dhe garanton lirinë fetare. Në tetor, Ambasadori u takua me Patriarkun e KOS-it Porfirije pas ceremonisë së tij të kurorëzimit në Pejë për të uruar Patriarkun dhe për të diskutuar shqetësimet e KOS-it”.

Në shtator, raporti thotë se një projekt i financuar nga ambasada mbi pluralizmin kulturor dhe fetar mblodhi së bashku më shumë se 40 udhëheqës fetarë, përfaqësues të shoqërisë civile dhe të rinj nga i gjithë vendi për të promovuar dialogun ndërfetar dhe bashkëjetesën paqësore.

Në dhjetor, thuhet se ambasadori dha vërejtje në diskutimin e hapur të qeverisë për ndryshimet në ligjin për lirinë fetare, duke i bërë thirrje qeverisë dhe liderëve fetarë që të sigurojnë mbrojtje të barabartë dhe shprehje të lirë të fesë për të gjithë.