Presidenca: Nuk ka arritur asnjë letër nga Kuvendi

Këshilltari për media në Zyrën e presidentes së Kosovës, Bekim Kupina, tha për Radion Evropa e Lirë se “deri më tani nuk ka arritur asnjë letër nga Kuvendi”.

“Para përgjigjes duhet të vijë pyetja”, shtoi ai, pasi u pyet për një deklaratë lidhur me atë që ndodhi në seancën konstituive të Kuvendit të Kosovës.

Kryesuesi i seancës konstituive të Kuvendit të Kosovës, Avni Dehari, pas një pauze të shkurtër ka ndërprerë seancën, për shkak të mosmiratimit të raportit të Komisionit për verifikimin e mandateve.

“Në këto rrethana detyrohemi ta ndërpresim seancën dhe me një letër të njoftojmë presidenten se si do të veprohet në të ardhmen”, tha ai.

Faton Peci nga Vetëvendosja tha se tani është në diskrecionin e presidentes Vjosa Osmani të japë një përgjigje ose t’i drejtohet Gjykatës Kushtetuese.

Kurti: Mosvotimi i raportit për mandate, sulm ndaj Kosovës dhe zgjedhjeve demokratike

Kryetari i Lëvizjes Vetëvendosje, Albin Kurti, e cilësoi si “sulm brendainstitucional” kundër Kosovës dhe zgjedhjeve demokratike mosvotimin e raportit të Komisionit për verifikimin e mandateve dhe kuorumit.

“Kjo është situatë e paparë në shtetin tonë e shumë më gjerë. Ne qeverisim mbarë e mirë, këta lanë nam e bëjnë lajm të keq për shtetin tonë. Se janë kundër qeverisë e Republikës dihet, por se janë edhe kundër vetvetes, këtë e mësuam sot”, shkroi Kurti në Facebook.

Deputetët e partive opozitare, PDK, LDK dhe AAK, votuan kundër raportit, ndërkaq Lista Serbe abstenoi.

Përfaqësuesit e opozitës vunë në dyshim dorëheqjen e Kurtit nga posti i kryeministrit dhe anëtarëve të tjerë të Qeverisë që janë zgjedhur deputetë në zgjedhjet e 9 shkurtit.

Abdixhiku e akuzon LVV-në për zvarritje të krijimit të institucioneve

Kryetari i LDK-së, Lumir Abdixhiku, tha se partia e tij do të votojë raportin e Komisionit të përkohshëm për verifikimin e mandateve, sapo anëtarët e Qeverisë – që janë zgjedhur deputetë – të japin dorëheqje.

Ai u pyet për letrën e dorëheqjes të dorëzuar në këtë komision nga Qeveria në detyrë. Por, Abdixhiku nuk e pranoi këtë dorëheqje duke thënë se Kurti dhe anëtarët e tjerë thonë se kanë dhënë dorëheqje, por sipas tij, po vazhdojnë punën në Qeveri.

Sipas tij, e gjithë kjo është “pjesë e një loje politike për të zvarritur krijimin e institucioneve dhe për të blerë kohë”.

“Është episod i errët në demokracinë parlamentare ku partia fituese nuk respekton rregullin bazik që thotë që një i zgjedhur s’mund të jetë edhe ministër, kryeministër, e deputeti i Kosovës”, tha Abdixhiku.

Sipas kreut të LDK-së, ky qëndrim i LVV-së është “qëndrim bllokues”, pasi sipas tij, partia e Kurtit nuk i ka votat për kryeparlamentarin dhe Qeverinë e re.

Haxhiu: Opozita po tenton të vonojë konstituimin e Kuvendit

Ministrja në detyrë e Drejtësisë, Albulena Haxhiu, tha se Grupi Parlamentar i Lëvizjes Vetëvendosje ka qenë i pranishëm dhe i gatshëm për të vazhduar procedurat për vazhdimin e konstituimit të Kuvendit, por opozita, sipas saj, po mundohet të vonojë këtë proces.

“Ndodhi një situatë e paprecedent, opozita nuk e votoi raportin e Komisionit për verifikimin e kuorumit dhe mandateve”, veprim ky që, sipas saj, nuk ka ndodhur në të kaluarën.

“Këta [opozita] po tentojnë që të vonojnë konstitumin e Kuvendit të Kosovës”, tha Haxhiu.

Abrashi akuzon opozitën për shkaktimin e një “krize të panevojshme”

Kryesuesi i Komisionit të përkohshëm për verifikimin e mandateve dhe kuorumit, Artan Abrashi, e akuzoi opozitën për shkaktim të një “krize të panevojshme” pas mosmiratimit të raportit të komisionit.

“Kjo nuk ka ndodhur asnjëherë më herët, jemi në një terren të panjohur dhe si do të vazhdohet tutje mbetet e mjegullt”, tha ai për gazetarët në hollin e Kuvendit, pas ndërprerjes së seancës konstituive.

Abrashi, nga Lëvizja Vetëvendosje, tha se anëtarët e Komisionit të përkohshëm, përmes një shkrese, janë njoftuar përmes një letre për dorëheqjen e Albin Kurtit nga posti i kryeministrit dhe i anëtarëve të Qeverisë aktuale, që janë zgjedhur deputetë.

Krasniqi: Letra e Kurtit nuk është letër dorëheqjeje

Kryetari i Partisë Demokratike të Kosovës, Memli Krasniqi, tha se deri tek ndërprerja e seancës konstituive të Kuvendit erdhi si pasojë e veprimeve të Lëvizjes Vetëvendosje.

Krasniqi, tha se seanca nuk do të mund të procedonte tutje për shkak se dorëheqjet kabinetit qeveritar do të duhej të bëheshin me kohë.

Krasniqi tha se raporti i Komisionit për verifikimin e mandateve nuk është votuar nga PDK-ja pasi letra e dorëheqjes së kryeministrit Albin Kurti, nuk është serioze.

Krasniqi tha se Kurti do të duhej të dërgonte një letër të mirëfilltë dorëheqjeje dhe atë ta dërgonte në Komisionin Qendror të Zgjedhjeve.

Peci: Opozita dhe Lista Serbe pamundësuan konstituimin e Kuvendit

Ministri në detyrë, Faton Peci, tani deputet i zgjedhur në listën e Lëvizjes Vetëvendosje, tha se konstituimin e Kuvendit të Kosovës e pamundësuan Lista Serbe dhe partitë opozitare shqiptare, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës.

“Kjo është një rrethanë e re që në aspektin kushtetues dhe ligjor dhe të rregullores së punës së Kuvendit nuk është e paraparë dhe e definuar dhe, rrjedhimisht, kryesuesi i seancës së sotme ka vendosur që për një situatë të tillë të re, t’i drejtohet Presidentes së Kosovës”, tha Peci pas ndërprerjes së seancës.

Peci tha se tani është në diskrecionin e presidentes Vjosa Osmani të kthej një përgjigje ose t’i drejtohet Gjykatës Kushtetuese.

Dehari ndërpret seancën konstituive

Kryesuesi i seancës konstituive të Kuvendit të Kosovës, Avni Dehari, pas një pauze të shkurtër ka ndërprerë seancën, për shkak të mosmiratimit të raportit të Komisionit për verifikimin e mandateve.

“Në këto rrethana detyrohemi ta ndërpresim seancën dhe me një letër të njoftojmë presidenten se si do të veprohet në të ardhmen”, tha ai.

Kurti jep dorëheqje nga posti i kryeministrit

Kreu i Lëvizjes Vetëvendosje, Albin Kurti, ka dhënë dorëheqje nga posti i kryeministrit, në mënyrë që të mund të bëjë betimin si deputet i legjislaturës së nëntë.

Dorëheqje kanë dhënë edhe anëtarët e tjerë të Qeverisë në detyrë të Kosovës, që janë zgjedhur deputetë në zgjedhjet e 9 shkurtit.

Zemaj: Votova kundër pasi u vonua dëshmia për dorëheqjen kryeministrit dhe ministrave

Deputeti i Lidhjes Demokratike të Kosovës, Armend Zemaj, njëherësh i caktuar në Komisionin për verifikim të mandateve, tha se votoi kundër raportit për shkak se e morën me vonesë dokumentacionin për dorëheqjen e kryeministrit dhe ministrave.

“Nuk është shpërndarë dokumentacioni me kohë sa i përket aktit të dorëheqjes së kryeministrit dhe ministrave të cilët janë zgjedhur si deputetë”, deklaroi Zemaj.

Zemaj tha se nuk përkrahën raportin e Komisionit pasi sic tha ai, ekzistonte rreziku se ish-kryeministri Albin Kurti, do të mund të kthej sërish në zyrën e kryeministrit në objektin e Qeverisë.

Kjo sipas Zemajt do të paraqiste shkelje kushtetuese.

Kuvendi s’e voton raportin e Komisionit për mandate

Deputetët e Kuvendit të Kosovës nuk e kanë votuar raportin e Komisionit të përkohshëm për verifikimin e mandateve dhe kuorumit.

Komisioni i përkohshëm para deputetëve paraqiti raportin dhe kërkoi që ai të votohej, me qëllim që të verifikoheshin mandatet 120 deputetëve të zgjedhur më 9 shkurt, në bazë të listës së certifikuar nga Komisioni Qendror i Zgjedhjeve.

Deputetët e LVV-së dhe të Nismës Socialdemokrate kanë votuar për raportin. Kundër ishin ata të PDK-së, LDK-së dhe AAK-së.

“Pesëdhjetë e dy deputetë kanë votuar për, 46 kundër dhe 11 kanë abstenuar. Në bazë të kësaj, konstatojmë se raporti i Komisionit të përkohshëm nuk kalon”, tha kryesuesi i seancës.

Për votoi VV dhe Nisma, kundër ishin LDK, PDK dhe AAK, ndërsa Lista Serbe abstenoi.

Kryesuesi i seancës ftoi përfaqësuesit e subjekteve politike që të konsultohen, duke bërë që Kuvendi sërish të shkojë në pauzë.

Komisioni për mandate nis takimin

Pas formimit të Komisionit të përkohshëm për verifikimin e mandateve dhe kuorumit, seanca plenare shkoi në pauzë 15-minutëshe, në mënyrë që ky komision të mund të përpilojë raportin e tij, i cili më pas duhet të miratohet.

Formohet komisioni për verifikimin e mandateve

Partitë e përfaqësuara në Kuvendin e Kosovës kanë propozuar emrat e tyre për anëtarë të Komisionit të përkohshëm për verifikimin e kuorumit dhe të mandateve të deputetëve.

Ky komision udhëhiqet nga LVV-ja, partia fituese e zgjedhjeve.

Formimi i këtij komisioni është pika e parë e rendit të ditës të seancës konstituive të Kuvendit.

Në sallë janë të pranishëm 119 deputetë, të cilët votuan për krijimin e këtij komisioni të përkohshëm.