Bayern Munich ka vendosur ta afrojë në ekipin e parë sulmuesin e ri Arijon Ibrahimovic për sezonin e ardhshëm.

Futbollisti njëzet vjeçar, i cili sezonin e kaluar ka qenë i huazuar te Heidenheim, do të jetë pjesë e skuadrës së trajnerit Vincent Kompany. Ibrahimovic ka kontratë me Bayernin deri më 30 qershor 2028 dhe në sezonin e ri do ta bartë fanellën me numrin 22.

Drejtori sportiv i Bayernit, Christoph Freund, e ka vlerësuar zhvillimin e sulmuesit të ri dhe ka thënë se tani Ibrahimovic është gati të bëjë hapin e madh në ekipin e parë.

“Arijoni iu bashkua Bayernit kur ishte dymbëdhjetë vjeç. Ai është zhvilluar hap pas hapi përmes akademisë sonë dhe huazimeve të planifikuara. Sidomos gjatë vitit të fundit te Heidenheim, ai ka mësuar shumë dhe është përgatitur për Bayern”, ka deklaruar Freund.

Gjatë sezonit të fundit me Heidenheimin, ai zhvilloi tridhjetë e katër ndeshje në të gjitha garat, duke shënuar dy gola dhe duke dhënë pesë asistime. Gjithashtu, në nëntor bëri debutimin me Kombëtaren U21 të Gjermanisë, për të cilën deri tani ka dy paraqitje.