Këtë vikend më 10 dhe 11 dhjetor në qytetin e Pejës u organizua me sukses liga e përbashkët në pingpong Kosovë-Shqipëri ku u zhvilluan ndeshjet e fazës së parë të këtij edicioni ku u ballafaquan katër ekipet më të mira nga Kosova dhe Shqipëria në konkurrencën e meshkujve dhe femrave.

Në ceremoninë e hapjes ishin të pranishëm edhe kryetari i Komunës së Pejës z.Gazmend Muhaxheri, drejtoresha e DKRS-së znj.Xhenet Syka, z. Klodian Gjata, përfaqësues i Federates Shqiptare të Pingpongut, ku pas fjalimeve të tyre, pas një përshëndetje e fjalimi motivues aktiviteti u shpall i hapur edhe zyrtarisht nga z. Agron Gashi, përfaqësues i MKRS-së të cilët i falenderoi kryetari i Federatës së Pingpongut të Kosovës z.Jeton Beqiri dhe më pas u vazhdua me një paraqitje të përgatitur nga ansambli “Rugova”. Ndeshjet u përcollën edhe nga z. Bujar Turjaka, anëtar i bordit ekzekutiv të KOK-ut dhe z.Tonin Binoshaj, sekretari i Federates Shqiptare të Pingpogut dhe anëtar i Komitetit Olimpik të Shqipërisë, të cilat u zhvilluan në sallën e sportit të gjimnazit “Bedri Pejani” në një atmosferë tejet të mirë sportive dhe kushte shumë të mira organizative falë edhe kontributit të z.Qamil Vishaj dhe përkrahjes nga Komuna e Pejës.

Në konkurrencën e meshkujve ekipet nga Kosova u treguan më të suksesshme ku “Lidhja e Prizrenit”, “Priping” dhe “Dardania” treguan paraqitje shumë stabile duke shënuar katër fitore nga katër ndeshjet e zhvilluara kurse “Liria” shënoi dy fitore dhe dy humbje. Për shkak të rezultateve në ligat vendore “Lidhja e Prizrenit” i prinë tabelës në konkurrencën e meshkujve.

Në konkurrencën e femrave ndeshjet ishin më të barazpeshuara dhe tejet interesante. Edhe këtë edicion “Teuta” e Durrësit i prinë radhitjes tabelare falë fitores që shënoi nga “Drita” e Gjilanit me rezultat 3 me 0 dhe kështu për të shënuar katër fitore nga katër ndeshjet e zhvillaura këtë vikend. Në vendin e dytë mbetet “Drita” me vetëm një humbje të përcjellur nga “Ahmet Hoxha” në vendin e tretë me vetëm dy humbje.

Rezultatet

Tabelat