Oligarku miliarder Roman Abramovich është bërë shtetas i BE-së, tre vjet pasi tërhoqi aplikimin e tij për vizë në Mbretërinë e Bashkuar mes tensioneve diplomatike midis Londrës dhe Moskës.

Abramovich përdori një ligj portugez që ofronte nënshtetësi për pasardhësit e hebrenjve sefardikë që u dëbuan nga gadishulli Iberik gjatë Inkuizicionit, sipas një raporti në gazetën portugeze Público.

Në vitin 2018, Abramovich zgjodhi të mos ndiqte një aplikim për vizë në Mbretërinë e Bashkuar për shkak të akuzave ndërkombëtare pas incidentit të helmimit në Salisbury dhe ndryshimeve që e bëjnë më të vështirë për rusët e fuqishëm marrjen e vizave.

Komplikimet e kishin shtyrë Abramovich të tërhiqte planet për të ndërtuar një stadium 500 milion eurosh për Chelsean.

Pasaporta e tij e re e BE-së do të thotë që biznesmeni do të duhet të kalojë sistemin e emigracionit të bazuar në pikë të Britanisë pas Brexit dhe të përmbushë “kërkesat specifike” nëse ai tani zgjedh të qëndrojë dhe të punojë në ishull.

Pasaporta e tij portugeze tani atij ia mundëson që të vizitojë familjen e tij në Britani pa pasur nevojë për vizë.

Mijëra hebrenj izraelitë u është dhënë shtetësia portugeze që nga miratimi i ligjit në vitin 2015, me gjenealogjitë e aplikantëve të verifikuara nga ekspertë që kërkojnë prova të interesit për kulturën sefardike.

Dokumentet e ministrisë së drejtësisë tregojnë se Abramovich mori shtetësinë e tij më 30 prill.

Një rrugë e njohur për oligarkët rusë – disa prej të cilëve janë akuzuar për korrupsion – për të fituar pasaporta të BE-së ishte duke shfrytëzuar skemat e diskutueshme të “vizave të arta”.

Në vitin 2017, qeveria e Qipros kishte mbledhur më shumë se 4 miliardë euro në katër vjet duke u dhënë shtetësi super të pasurve, duke u dhënë atyre të drejtën për të jetuar dhe punuar në të gjithë Evropën në këmbim të investimeve në para. Dokumentet treguan se më shumë se 400 pasaporta në vit lëshoheshin përmes skemës, raporton Guardian, transmeton Klankosova.tv.

Rreth 300,000 hebrenj jetonin në Spanjë kur, në vitin 1492, “monarkët katolikë”, Mbretëresha Isabella e Kastiljes dhe Mbreti Ferdinand i Aragonit, i urdhëruan ata dhe myslimanët e vendit të konvertoheshin në katolicizëm ose të largoheshin. Dhjetëra mijëra ikën në Portugali, vetëm për t’u persekutuar atje ose për t’u dëbuar më 1496.

Abramovich e bëri pasurinë e tij – që besohet të jetë më shumë se 10 miliardë funte – në industrinë e naftës të Rusisë në vitet 1990 dhe bleu Chelsean më 2003.