Fiknete Bejta vlerësohet me numër 2 në listën e AKR për Asamble

16/08/2021 Mentor Barani Pa Komente

Fiknete Bejta e cila njëkohësisht është edhe asambleiste aktuale në Kuvendin Komunal të Prishtinës ka bërë të ditur se do garoj në listen e z. Selim Pacolli, ajo do të jetë e rënditur me numër 2 në ketë listë, që siç thotë znj. Bejta është vlerësim i punës së saj në mandatin e parë.

Tutje Fiknete Bejta bëri të ditur se ja ka shpalosur disa ide z. Pacolli që kanë të bëjnë me zhvillimin e Prishtinës, duke besuar se do jenë pjesë e ekzekutivit në mandatin tjetër.

Më poshtë gjeni njoftimin e plotë të znj Bejta për kandidimin e saj për mandat të dytë në asamble komunale.

“Të dashur miq e qytetarë të Prishtinës,

I gjithë përkushtimi profesional e intelektual, por edhe vet jeta ime i është dedikuar Prishtinës, qytetit tim, kryeqytetit të Republikës së Kosovës. Nuk ka më mirë se të punosh për shtëpinë e për komunitetin ku përket, prandaj në fund të mandatit të parë si asambleiste në Kuvendin Komunal të Prishtinës, ndjehem shumë mirë dhe krenare që me aq mundësi sa ka një asambleiste e pavarur, iniciova projekte që e bënë dhe do ta bëjnë më të mirë Prishtinën tonë.

Do të veçoja me krenari nismën time në Komunë për restaurimin dhe konservimin e shtëpisë së Mulla Ademit, që tutje do të bëhet muze i luftës, nismën për përfshirjen e fshatit Prapashticë në linjën e rregullt të Trafikut Urban, nismën për ndarjen e hapësirë për ndërtimin e Pllakës Përkujtimore për viktimat e luftës të Sofalisë e Toukbashqes, si dhe nismën për ndërtimin e Memorialit Përkujtimor për Masakrën e 1921 në Prapashticë dhe Keqekollë.

Garës për Kuvend Komunal po i hyj edhe njëherë.

Dëshiroj t’ju njoftoj se Lista e Selim Pacollit, duke respektuar punën time në Kuvend Komunal, më ka ftuar që të garojmë së bashku në zgjedhjet lokale që po vijnë, me numrin #2 në listë. E njoh nga afër përkushtimin dhe zotësinë e z. Pacolli, prandaj nuk hezitova që të jem pjesë e këtij ekipi, që pas datës 17 tetor do të bëhet udhëheqja e re e Prishtinës, për t’i gjetur zgjidhjet problemeve të shumta në kryeqytet.

Unë ia kam shprehur z. Pacolli disa prej objektivave kryesore që duhet t’i arrijmë me qeverisjen e re në Prishtinë, siç janë zhvillimi i një strategjie për zhvillimin e turizimit dhe agroturizmit, gjithëpërfshirja e shërbimeve shëndetësore duke shtuar orarin e QKMF-ve, sigurimin e punës praktike për shkollat profesionale, hartimi i rregullores për arsim, si dhe intervenimi i shpejtë për ngritjen e cilësisë së arsimit, por edhe ambientit ku zhvillohet mësimi në përgjithësi pastaj prioritet duhet ta kemi shtimin e numrit të çerdheve publike.

Ka edhe shumë ide e plane të tjera, të cilat do t’i bashkë-diskutojmë gjatë ditëve e javëve të ardhshme. Do të kërkoj mbështetjen tuaj edhe një herë, duke premtuar atë që mund ta realizoj.

Më gjeni në Listën e Selim Pacollit te #2 !”

Konkurs

KATEGORITË