Tri raste të dhunës në familje janë raportuar gjatë 24 orëve të fundit në Lipjan, Podujevë dhe Prishtinë.

Sipas raportit 24-orësh të Policisë së Kosovës, në Lipjan, një burrë dyshohet se për motive të panjohura ka ushtruar dhunë fizike ndaj bashkëshortes dhe vajzës së tij, duke u shkaktuar atyre lëndime. Viktimave u është ofruar ndihma mjekësore, ndërsa i dyshuari ndodhet në arrati. Rasti është duke u hetuar.

Në Podujevë, është arrestuar një burrë, i dyshuar se ka ushtruar dhunë fizike ndaj bashkëshortes së tij. Viktimës i është ofruar ndihma mjekësore, ndërsa me vendim të prokurorit i dyshuari është dërguar në mbajtje.

Ndërkaq, në Prishtinë, një burrë është shoqëruar për intervistim, nën dyshimin se kishte dëbuar nga shtëpia dhe kishte kanosur bashkëshorten e tij. Pas intervistimit dhe konsultimit me prokurorin, i dyshuari është liruar dhe rasti do të vazhdojë në procedurë të rregullt.