Argjentina do të përballet me një hetim lidhur me incidentet e shëmtuara që ndodhën në fund të finales së Kupës së Botës, ka konfirmuar FIFA.

Komisioni Disiplinor i FIFA-s ka emëruar një prokuror disiplinor dhe etik për të shqyrtuar ngjarjet që ndodhën pas vërshëllimës përfundimtare në stadiumin MetLife.

Çdo lojtar ose trajner i përfshirë në përleshje mund të përballet me pezullim, ndërsa edhe Federata Argjentinase e Futbollit (AFA) mund të gjobitet.

Pas humbjes 1:0 të së dielës, disa anëtarë të kombëtares së Argjentinës dhe stafit teknik u përfshinë në përplasje me futbollistët e Spanjës, teksa këta të fundit nisën festimet për triumfin në Kupën e Botës.

Në incident dukeshin të përfshirë Nahuel Molina, Leandro Paredes, Thiago Almada dhe ndihmëstrajneri Roberto Ayala.

Fillimisht, FIFA raportoi se Paredes ishte ndëshkuar me karton të kuq nga gjyqtari Slavko Vinčić, pasi kishte shtyrë nga fyti mbrojtësin e Spanjës, Eric Garcia.

Megjithatë, kartoni i kuq i Paredes u hoq pak më vonë nga procesverbali zyrtar dhe FIFA i ka konfirmuar BBC Sport se ndaj tij nuk u ndërmor asnjë masë disiplinore në atë moment.

Argjentina kishte mbetur më herët me një lojtar më pak, pasi Enzo Fernández u përjashtua me kartonin e dytë të verdhë në minutat shtesë të pjesës së dytë.

Ndërkohë, FIFA kishte nisur tashmë procedurat për masa të mundshme disiplinore ndaj Argjentinës, pasi lojtarët e saj shfaqën një pankartë në mbështetje të pretendimeve të vendit të tyre për Ishujt Falkland, pas fitores 2:1 ndaj Anglisë në gjysmëfinale.