Liderët e Bashkimit Evropian janë mbledhur në Bruksel për një samit të dominuar nga vetoja e Hungarisë për kredinë prej 90 miliardë eurosh për Ukrainën, lufta në përshkallëzim në Lindjen e Mesme dhe çmimet e larta të energjisë që vazhdojnë të rëndojnë ekonominë.

Dita nisi me vështirësi pasi kryeministri hungarez Viktor Orbán rikonfirmoi veton e tij ndaj kredisë prej 90 miliardë eurosh për Ukrainën, të cilën e lidhi me ndërprerjet e furnizimit me naftë përmes tubacionit të dëmtuar Druzhba.

“Ne jemi të gatshëm ta mbështesim Ukrainën kur të na vijë nafta jonë, e cila po bllokohet prej tyre. Deri atëherë, nuk do të ketë asnjë vendim që është në favor të Ukrainës”, tha Orbán të enjten.

Presidenti i Këshillit Evropian, António Costa, e kritikoi veton e Orbánit, duke thënë se “kjo lloj sjelljeje nuk është e pranueshme dhe shkel parimet e mirëbesimit dhe bashkëpunimit të sinqertë të parashikuara në traktate”, sipas një zyrtari të BE-së.

Një tjetër çështje e nxehtë në agjendë ishin sulmet amerikano-izraelite ndaj Iranit dhe pasojat në përshkallëzim për Lindjen e Mesme dhe ekonominë globale.

Në përfundimet e tyre të përbashkëta, liderët bënë thirrje për “de-përshkallëzim dhe vetëpërmbajtje maksimale”, si dhe për një “moratorium mbi sulmet ndaj objekteve energjetike dhe ujore”.

Ndërsa 27 krerët e shteteve dhe qeverive ranë dakord se lundrimi nëpër Ngushticën e Hormuzit duhet të rikthehet urgjentisht, ata thanë se vendosja e një misioni detar, siç është kërkuar nga presidenti amerikan Donald Trump, duhet të ndodhë “kur të plotësohen kushtet”.

Diplomatët thonë se kjo nënkupton ndërprerjen e luftimeve.

Samiti vazhdoi me një debat për ekonominë, i ndikuar fuqishëm nga rritja e çmimeve të energjisë dhe frika në rritje për stagflacion.

Në përfundimet e tyre, liderët e BE-së i bënë thirrje Izraelit të lejojë hyrjen e menjëhershme dhe të papenguar të ndihmës humanitare, si dhe shpërndarjen e saj të vazhdueshme në të gjithë Gazën, përfshirë përmes Korridorit Detar të Qipros, si plotësim i rrugëve tokësore.

Në përfundimet e tyre, krerët e shteteve dhe kryeministrat e BE-së shprehën alarm për përkeqësimin e krizës humanitare në Gaza, duke i përshkruar kushtet si “katastrofike” dhe duke kërkuar veprim urgjent.

Liderët e BE-së theksuan gjithashtu nevojën që Kombet e Bashkuara, agjencitë e saj dhe organizatat humanitare të veprojnë në mënyrë të pavarur dhe të paanshme në Gaza, për të shpëtuar jetë dhe për të lehtësuar vuajtjet.

Ata po ashtu i kërkuan Izraelit të tërheqë vendimin për ligjin mbi regjistrimin e OJQ-ve, të rihapë pikat kufitare drejt Gazës dhe të respektojë plotësisht detyrimet e tij sipas së drejtës ndërkombëtare, përfshirë të drejtën ndërkombëtare humanitare. /Euro News/