Presidentja e Kosovës, Vjosa Osmani, ka komentuar për herë të parë në mënyrë të drejtpërdrejtë polemikat rreth dekretit të saj, gjatë një interviste live në emisionin e Çim Peka në Syri TV.

E pyetur nga gazetari për kritikat dhe debatet që janë hapur lidhur me këtë vendim, Osmani theksoi se askush nuk është i pagabueshëm, duke deklaruar se vendimi përfundimtar i takon Gjykatës Kushtetuese.

“Nuk jam Pejgamber që të mos bëj gabime. Aktvendimet e Gjykatës Kushtetuese mund të interpretohen në forma të ndryshme, por ne duhet të presim vendimin e saj,” tha Osmani gjatë intervistës.

Deklarata erdhi pasi gazetari insistoi me pyetje rreth bazës kushtetuese të dekretit dhe debatit politik që është krijuar në Kosovë për këtë çështje. Presidentja u shpreh se interpretimet juridike shpesh dallojnë, ndërsa theksoi se institucioni që e jep fjalën e fundit është Gjykata Kushtetuese.

Megjithatë, kjo deklaratë është parë nga shumë analistë politikë si një sinjal se në Presidencë ekziston një pritje e tensionuar për vendimin e Gjykatës Kushtetuese, ndërsa debati rreth ligjshmërisë së dekretit të saj vazhdon të mbetet një nga temat më të nxehta në skenën politike në vend.

Çështja pritet të marrë një kthesë vendimtare sapo Gjykata Kushtetuese e Kosovës të japë interpretimin e saj përfundimtar mbi këtë rast.