Kalimi i vetëm kufitar i Gazës me Egjiptin, Rafah, është rihapur pjesërisht të hënën në mëngjes, pas gati dy vitesh mbyllje nga Izraeli, sipas një zyrtari izraelit të sigurisë. Rihapja u mundëson një numri të kufizuar palestinezësh të hyjnë dhe të dalin nga Gaza.

Bashkimi Evropian po operon pikëkalimin Rafah si pjesë e fazës së parë të armëpushimit të ndërmjetësuar nga Shtetet e Bashkuara, i cili hyri në fuqi në mesin e tetorit.

Kalimi kufitar, i cili ka qenë kryesisht i mbyllur që nga maji i vitit 2024, pas marrjes së kontrollit nga Izraeli, iu nënshtrua përgatitjeve nga Bashkimi Evropian, Egjipti dhe palë të tjera të përfshira në funksionimin e tij.

Sipas mediave shtetërore egjiptiane, gjatë ditëve të para vetëm 50 persona në ditë do të lejohen të kalojnë në të dy drejtimet. CNN kishte raportuar më herët se 150 palestinezë do të lejoheshin të largoheshin nga Gaza çdo ditë, ndërsa vetëm 50 persona do të lejoheshin të hynin.

Në Spitalin e Dëshmorëve të Al-Aksasë në Deir al-Balah, pacienti me dializë Ibrahim Al-Batran tha se spitalet në Gaza mund të ofrojnë vetëm kujdes minimal, duke theksuar se shumë pacientë kanë vdekur duke pritur trajtim jashtë vendit.

Sipas Ministrisë palestineze të Shëndetësisë, mbi 20 mijë pacientë në Gaza janë në pritje të lejes për të udhëtuar jashtë për trajtim mjekësor, përfshirë të paktën 440 raste që konsiderohen kërcënuese për jetën. Ministria njofton se rreth 1,300 persona kanë vdekur pasi janë detyruar të presin për trajtim jashtë Gazës.

Rihapja e plotë e pikëkalimit Rafah ishte pjesë e fazës së parë të marrëveshjes së armëpushimit, por Izraeli kishte refuzuar hapjen e tij deri në kthimin e të gjithë pengjeve. Pengu i fundit i vdekur, Ran Gvili, u kthye në Izrael javën e kaluar.

Kryeministri izraelit Benjamin Netanyahu ka deklaruar se hapja e pikëkalimit do të jetë e kufizuar dhe nuk do të lejojë kalimin e ndihmave humanitare apo mallrave tregtare.

Rihapja e Rafahut shënon përfundimin e fazës së parë të marrëveshjes së armëpushimit me 20 pika, ndërsa Shtetet e Bashkuara kanë njoftuar fillimin e fazës së dytë të marrëveshjes. / Burimi: CNN