Kryeministri i Senegalit, Ousmane Sonko, i ka cilësuar si të turpshme dhe të dhimbshme incidentet që ndodhën në finalen e Kupës së Kombeve në Afrikë mes Senegalit dhe Marokut.

Komentet e tij kanë ardhur para vendimit të mundshëm disiplinor nga Konfederata Afrikane e Futbollit (CAF), pasi lojtarët e Senegalit ishin larguar përkohësisht nga fusha në shenjë proteste pas një penalltie të dhënë me VAR. 

Një grup tifozësh senegalezë ishin përplasur me sigurimin maroken, ndërsa tetëmbëdhjetë prej tyre janë arrestuar dhe do të përballen me drejtësinë në Marok.

Sonko ka thënë se këto veprime duhet të kuptohen si shpërthime emocionale të nxitura nga pasioni sportiv, e jo si përçarje politike apo kulturore mes dy vendeve.

CAF ka njoftuar se do të marrë masa pasi të shqyrtojë raportet e ndeshjes, ndërsa presidenti i FIFA-s, Gianni Infantino, e ka dënuar sjelljen e lojtarëve dhe stafit teknik të Senegalit.