Presidenti amerikan Donald Trump ka reaguar lidhur me shkeljen e hapësirës ajrore të Polonisë nga dronët rusë, të cilën ushtria polake dhe liderët evropianë e konsideruan “të paprecedentë.”

“Çfarë po ndodh me Rusinë që po shkel hapësirën ajrore të Polonisë me dronë? Ja ku shkojmë!” shkroi Trump të mërkurën në platformën e tij sociale.

Pritet që Trump të flasë me Presidentin polak Karol Nawrocki të mërkurën, sipas një zyrtari të Shtëpisë së Bardhë, raporton abcnews.

Hapësira ajrore e Polonisë u shkel nga të paktën 19 dronë rusë gjatë natës, sipas kryeministrit. NATO dërgoi dy F-16 polakë dhe dy F-35 holandezë për t’i rrëzuar ata, duke shënuar herën e parë që avionë luftarakë të aleancës reagojnë brenda hapësirës ajrore të një aleati.

Trump kishte premtuar javën e kaluar se do të mbështeste Poloninë, duke thënë: “Jemi me Poloninë deri në fund.”

Ministri i Jashtëm polak, Radek Sikorski, deklaroi se Presidenti rus Vladimir Putin “qesh” me përpjekjet e paqes së Trump dhe shpreson që fjalët e tij të mbështeten me veprime.

Ambasadori amerikan në NATO, Matthew Whitaker, shkroi: “Jemi pranë Aleatëve tanë të NATO-s dhe do të mbrojmë çdo centimetër të territorit të NATO-s.”