Teksa fushata për zgjedhjet lokale të 12 tetorit po nxehet dhe emrat e kandidatëve për kryetarë komunash po bëhen publikë, reagimet në media dhe rrjetet sociale kanë shpërthyer me komente, akuza, mbështetje dhe analiza të ndryshme. Në këtë frymë, opinionisti dhe njohësi i zhvillimeve lokale, Zejdush Kastrati, ka ndarë mendimin e tij për disa prej komunave më të rëndësishme të Kosovës.

Në një analizë personale, Kastrati ndalet te tri komuna ku ai ka lidhje jetësore apo përvojë pune – Kamenica, Gjilani dhe Prishtina – duke ofruar një pasqyrë të qartë mbi performancën e kryetarëve aktualë dhe fuqinë e sfiduesve të tyre.

Kamenica: Rahimaj i paalternativë

Për Kamenicën, Kastrati vlerëson lart kryetarin aktual Kadri Rahimaj duke e përshkruar si të përkushtuar, bashkëpunues dhe të pastër nga afera korruptive.

“Përkundër buxhetit të kufizuar, Kamenica ka shënuar zhvillime infrastrukturore për lakmi,” thekson ai duke shtuar se mungesa e alternativës serioze nga partitë si LDK e PDK, e bën rizgjedhjen e Rahimajt thuajse të sigurt.

Gjilani: Hyseni me mbështetje qendrore, por me sfidë nga LDK

Ndërkohë në Gjilan, Kastrati vlerëson se Alban Hyseni ka arritur të realizojë disa projekte falë mbështetjes nga niveli qendror, por kritikohet për nepotizëm dhe mungesë të përmbushjes së premtimeve. Pika më e dobët e tij, sipas Kastratit, është autostrada Prishtinë-Gjilan, një premtim i pambajtur i bashkëpartiakëve të tij, përfshirë edhe kryeministrin Kurti.

Sfida më serioze për Hysenin vjen nga kandidati i LDK-së, Arbër Ismajli, një figurë me përvojë në pushtetin lokal dhe imazh pozitiv. Megjithatë, mbështetja e pjesshme dhe e ndarë brenda LDK-së, si dhe ndikimi i ish-kryetarit Lutfi Haziri, konsiderohen vendimtare për fatin e kandidaturës së tij.

Prishtina: Rama i zhgënjimit dhe kandidatura befasuese e Cekut

Në kryeqytet, Kastrati është mjaft kritik ndaj Përparim Ramës duke theksuar se përkundër fillimit premtues dhe projekteve për parqe, puna e tij është karakterizuar nga mosrealizime, mungesë transparence dhe përfolje për afera.

Për zgjedhjet në Prishtinë, Kastrati sheh si sfidues serioz Uran Ismajlin nga PDK, një figurë e fuqishme me përkrahje elektorale të dëshmuar.

Por, befasia më e madhe sipas tij është kandidatura e Hajrullah Çekut nga Vetëvendosje. Kastrati ngre pikëpyetjen: “Pse Ceku e jo Konjufca?” duke lënë të nënkuptohet se një marrëveshje e heshtur ndërmjet VV-së dhe PDK-së mund të jetë pas këtij vendimi. Sipas tij, nëse VV do të kandidonte Glauk Konjufcën për Prishtinën, ai do të fitonte qysh në rundin e parë.

Komunat e tjera: Favoritët pa shumë dilema

Në përmbyllje, Kastrati përmend disa kryetarë aktualë që sipas tij janë favoritë të padiskutueshëm për fitore në tetor: Agim Aliu në Ferizaj, Bali Muharremaj në Suharekë, Imri Ahmeti në Lipjan dhe Ramiz Lladrovci në Drenas, ndonëse ky i fundit, sipas tij, po përballet me përpjekje politike për t’u rrëzuar.

Analiza e Kastratit shërben si një reflektim i qartë mbi realitetin zgjedhor lokal në Kosovë dhe nxit diskutime të mëtejshme rreth kalkulimeve politike që formësojnë garën për pushtetin komunal. /Kosova.info/