Në seancën përfundimtare në procesin gjyqësor ndaj të akuzuarit për krime lufte në Kosovë, Zoran Vukotiq, palët kanë dhënë fjalën përfundimtare.

Mbi Vukotiqin rëndojnë katër aktakuza se në vitin 1999, i armatosur dhe me uniformë ka kryer krime në rajonin e Vushtrrisë.

Prokurorja speciale, Florije Saliu Shamolli, tha se vrasjet janë vërtetuar me prova e dëshmitarë.

Dënim maksimal për të akuzuarin Zoran Vukotiq kërkuan edhe përfaqësuesit e viktimave.

Ndërsa avokati mbrojtës i të akuzuarit Zoran Vukotiq ka thënë se kjo është hera e tretë që klienti i tij po gjykohet për krime lufte.

Rasti i parë përmban akuza për vrasje brutale, trajtim çnjerëzor, terror e plaçkitje ndaj karvanit të civilëve të zhvendosur në Studime të Epërme e atë të Poshtme si dhe për përfshirje në Masakrën e Studimes, në të cilën u vranë 116 civilë shqiptarë.

Ai akuzohet edhe për vrasjen e katër civilëve shqiptarë dhe keqtrajtimin e 18 të tjerëve në Vushtrri më 5 maj 1999. Ndërkaq rasti i tretë e ngarkon Vukotiqin me akuzën për vrasjen e 13-vjeçarit Burim Muli. Po ashtu Vukotiq akuzohet edhe për dhunim seksual gjatë luftës.

Vukotiq ishte dënuar me 6 vjet e 6 muaj burgim nga Gjykata për torturë të civilëve shqiptarë që mbaheshin në Burgun e Smrekonicës.