Pas më shumë se një dekade besnikëri, Jamie Vardy do të largohet nga Leicester City këtë verë, në përfundim të kontratës së tij.

Legjenda e klubit do t’i japë fund një rrugëtimi që e ktheu nga një sulmues anonim në një kampion të Anglisë dhe idhull për tifozët.

Vardy i ishte bashkuar Leicester në vitin 2012 nga klubi modest Fleetwood Town për vetëm një milion funta. Ai do të mbahet mend për sukseset e jashtëzakonshme me “Dhelprat”, përfshirë dy tituj në Championship, një FA Cup dhe titullin e Premier League në vitin 2016 – një arritje që sfidoi çdo parashikim dhe e ktheu Leicesterin në një sensacion.

Rruga e tij drejt majave ishte sa e pazakontë aq edhe frymëzuese. Nga liga jo-profesionale me Stocksbridge Park Steels, Vardy u shndërrua në golashënues të pamëshirshëm dhe ndër figurat më të dashura për tifozët anglezë, duke përfaqësuar edhe Kombëtaren e Anglisë në nivelet më të larta.

Presidenti i Leicester City, Aiyawatt Srivaddhanaprabha, e ka vlerësuar futbollistin si lojtar po edhe si njeri. “Jamie është unik. Ai është një lojtar i veçantë dhe një njeri edhe më i veçantë. Ai ka një vend të përhershëm në zemrat e të gjithë atyre që janë të lidhur me Leicester City, përfshirë edhe mua. Jam pafundësisht mirënjohës për gjithçka që ai i ka dhënë këtij klubi”, ka thënë ai. 

Gjatë karrierës së tij me Leicesterin, Vardy ka zhvilluar afro 500 ndeshje dhe ka realizuar mbi 190 gola, përfshirë edhe rekordin e jashtëzakonshëm të njëmbëdhjetë ndeshjeve radhazi me gol gjatë sezonit të artë të titullit.

Largimi i tij vjen në një moment të vështirë për klubin, pas rënies nga Premier League, dhe do të shënojë mbylljen e një kapitulli të lavdishëm për Leicester.

Ndeshja e fundit në shtëpi për Vardy do të zhvillohet më 18 maj kundër Ipswich, ndërsa lamtumira do të ndodhë më 25 maj në transfertë kundër Bournemouth.