Analisti Shenoll Muharremi ka reaguar ashpër ndaj ministrave të Qeverisë së Kosovës, të cilët nuk po japin dorëheqje pas shpalljes së zgjedhjeve të reja. Në një postim publik, Muharremi u shpreh i habitur me qëndrimin e tyre duke e quajtur të palogjikshme vonesën në dorëheqje dhe zvarritjen institucionale që po shkaktohet.

“Qysh more nuk po jepni dorëheqje? Kjo është krejt normale. Aty i keni zëvendësat që vazhdojnë me punë derisa të formohet qeveria,” shkroi ai duke theksuar se është fjala për një proces të zakonshëm dhe institucional.

Ai përmendi shembuj konkretë: “Nuk është Albini, është Bislimi. Nuk është Albulena, po Vigani” duke aluduar në zëvendësit e tyre që mund të mbajnë detyrën deri në formimin e qeverisë së re.

Muharremi tha se askush nuk duhet të mbajë peng një vend për shkak të pozitës që ka: “Ato pozita nuk janë me tapi. Jepni dorëheqje menjëherë dhe vendosni zëvendësit e juaj aty, se ky është rregulli. Ju jeni përgjegjës për zvarritjen prej këtij momenti.”

Ky reagim vjen në një kohë kur diskutohet gjerësisht për dorëheqjet e mundshme në qeveri në prag të zgjedhjeve të reja duke nxitur debat në opinionin publik për mënyrën e menaxhimit të tranzicionit politik. /Kosova.info/