Nga sot deri në fund të vitit 2023 kolegët ukrainas dhe afganë të strehuar në Kosovë do të udhëtojnë falas në të gjitha linjat e “Trafikut Urban” në Prishtinë.

Sipas njoftimit, këtë vendim e ka miratuar Komuna e Prishtinës, me kërkesën e paraqitur nga Asociacioni i Gazetarëve të Kosovës, për të pajisur me kartela 18 gazetarë të strehuar në Kosovë në kuadër të programit “Gazetarët në Rezidencë – Kosovë”.

“Kartelat e udhëtimit ia ka dorëzuar sot drejtores ekzekutive të AGK-së, Getoarbë Mulliqi Bojaj, Kryeshefi ekzekutiv i ndërmarrjes publike ‘Trafiku Urban’, Burim Maraj”, thuhet në njoftim.

Asociacioni i Gazetarëve të Kosovës me këtë rast falënderon për gatishmërinë dhe bashkëpunimin e frytshëm Komunën e Prishtinës dhe ndërmarrjen publike “Trafiku Urban”.

Kujtojmë se gazetarët janë strehuar në Kosovë në kuadër të programit “Journalists in Residence – Kosovo”, i cili është iniciuar nga “European Centre for Press and Media Freedom” ECPMF, e mbështetet financiarisht nga Qeveria e Republikës së Kosovës, Misioni i OSBE-së në Kosovë, si dhe iniciativa “Hannah Arendt”.