Partia Konservatore Popullore Evropiane (EPP) fitoi shumicën e votave në zgjedhjet për Parlamentin Evropian dhe partitë e ekstremit të djathtë do të kenë dukshëm më shumë deputetë se më parë, sipas projeksionit të parë të përbërjes së mbledhjes së re. 

Sipas projeksionit të prezantuar sonte nga kryetarja e Parlamentit Evropian, Roberta Metsola, grupet kryesore pro-evropiane, PPE dhe Socialdemokratët humbën disa mandate në total, por mbeten forcat dominuese në legjislaturën e BE-së.

Partitë e gjelbra dhe rajonale dhe partitë e së majtës së moderuar, të mbledhura në grupin Të Gjelbërit/Aleanca e Lirë Evropiane (Të Gjelbërit/EFA), janë humbësit më të mëdhenj të zgjedhjeve sepse humbën një numër të konsiderueshëm mandatesh.

Në mbledhjen e ardhshme pesëvjeçare të PE-së, PPE do të ketë 181 nga 720 deputetë, pak më shumë se në atë të mëparshmen dhe në vend të dytë është Aleanca Progresive e Socialistëve dhe Demokratëve (S&D), e cila do të ketë 135 deputetë, sipas në një projeksion të bazuar në vlerësimet e votave të fituara nga shtetet anëtare dhe anketat e daljes.

Vendin e tretë e zuri grupi liberal Renew Europe me 82 vende, i ndjekur nga dy grupet e ekstremit të djathtë – Konservatorët dhe Reformistët Evropianë (ECR) me 71 dhe Identiteti dhe Demokracia me 62 deputetë.

Nëse projeksionet rezultojnë të sakta, grupi politik i të Gjelbërve/EFA do të ketë 53 deputetë dhe e majta 34.

Në mbledhjen e re do të jenë 102 deputetë që nuk i përkasin asnjë grupi politik. Midis tyre janë 51 ish-deputetë dhe 51 të sapozgjedhur, përfshirë përfaqësues të Alternativës për Gjermaninë (AfD) të ekstremit të djathtë, e cila së fundmi u përjashtua nga grupi Identiteti dhe Demokracia. /Kosova.info/