Gjermania ka qenë dominuese ndaj Danimarkës në ndeshjen e 1/8 së finales së “Euro 2024”, por nuk ka arritur të shënojë përballë danezëve në pjesën e parë.

Pjesa e parë e këtij dueli që po zhvillohet në Dortmund u mbyll 0:0.

Gjermania shënoi në minutën e katërt me qendërmbrojtësin Nico Schlotterbeck, por goli u anulua pas rishikimit të situatës në VAR, ku u pa ndërhyrje e palejuar.

Gjermania krijoi edhe disa mundësi shënimi, por portieri dhe kapiteni i danezëve, Kasper Schmeichel, pati disa pritje të mira.

Edhe Danimarka rrezikoi në disa raste.

Mundësinë më të mirë e pati me Rasmus Hojlundin në minutën e parë shtesë të pjesës së parë, por intervenoi portieri Manuel Neuer.

Ky ballafaqim u ndërpre në minutën e 35-të.

Të dyja ekipet u futën në tunel për shkak të kushteve të rënduara atmosferike.

Pati stuhi të fortë, intensitet të lartë të shiut, vetëtima e breshër.

Megjithatë, ndeshja rifilloi pas disa minutash.

Gjermania nikoqire dhe Danimarka nuk kanë pësuar humbje në fazën grupore. 

Fituesi i këtij ballafaqimi në çerekfinale do të luajë me fituesin e ndeshjes Spanja – Gjeorgjia.